Həmyerlimiz beynəlxalq olimpiadada qızıl medal qazandı
Dubayda təşkil olunan “FISO – Future Intelligence Students Olympiad” beynəlxalq yarışının 2-ci qlobal mərhələsində Azərbaycanın daha bir yetirməsi uğurla çıxış edib.
TodayPress TV xəbər verir ki, Xətai rayonu, S.Həsənov adına 63 nömrəli tam orta məktəbin şagirdi Rauf Müzəffərov olimpiadada “IQ” kateqoriyası üzrə qızıl medala layiq görülüb. Gənc istedad yarışda yüksək nəticə göstərməklə yanaşı, sözügedən tədbirdə milli geyimlə çıxış edib.
Tədbirin sonunda Rauf Müzəffərova təşkilatçılar tərəfindən “Təşəkkür Sertifikatı” və qızıl medal təqdim olunub. Belə uğurlar Azərbaycanın gənc nəsillərinin həm intellektual, həm də mədəni potensialını dünyaya nümayiş etdirmək baxımından böyük önəm daşıyır.
