Aqrar sığorta ekspertliyinə namizədlər üçün sənəd qəbulunun müddəti uzadıldı

Aqrar sığorta fəaliyyəti üzrə müstəqil ekspert sertifikatı almaq istəyən şəxslər üçün sənəd qəbulunun müddəti iyul ayının 27-nə qədər uzadılıb.

TodayPress TV xəbər verir ki, müstəqil ekspert sertifikatı almaq istəyən namizədlər üçün təlimlər 2025-ci il 4-11 avqust tarixlərində Aqrar Sığorta Fondunun inzibati binasında, Bakı şəhəri, Xətai rayonu, 8 Noyabr prospekti 175 ünvanında təşkil ediləcək.

Qeyd edək ki, təlimlər Azərbaycan Respublikası Nazirlər Kabineti tərəfindən təsdiq edilmiş “Aqrar sığorta fəaliyyəti üzrə müstəqil ekspertlərin imtahanının keçirilməsi Qaydası”na əsasən keçirilir.

Təlimlər aşağıdakı növ sertifikatların verilməsi üçün müstəqil ekspert olmaq istəyən şəxslərin Azərbaycan Respublikasının Dövlət İmtahan Mərkəzi tərəfindən keçiriləcək imtahanlara buraxılması üçün təşkil olunur:

1. Kənd təsərrüfatı bitkilərinin və bitkiçilik məhsullarının (çoxillik əkmələr də daxil olmaqla) sığortası üzrə müstəqil ekspert sertifikatı;

2. Kənd təsərrüfatı heyvanlarının və kənd təsərrüfatı məqsədilə yetişdirilən heyvanların sığortası üzrə müstəqil ekspert sertifikatı;

3. Akvakultura məhsullarının sığortası üzrə müstəqil ekspert sertifikatı.

İmtahanda iştirak ödənişlidir.

Təlimlərin təşkili və keçirilməsi ilə bağlı əlavə məlumat almaq üçün Aqrar Sığorta Fondunun 1651 “Çağrı Mərkəzi” (və ya 055 500 84 23 nömrəsi) ilə əlaqə saxlamaq, məlumatları [email protected] elektron poçt ünvanına göndərmək lazımdır.