Türkiyədə yanğın nəzarət altına alındı

İyulun 15-də Türkiyənin Ayvacık bölgəsində başlayan meşə yanğını Naldökən, Tuzla, Taşağıl və Çamköy kəndlərinə yayılıb.

TodayPress TV xəbər verir ki, yanğının söndürülməsi üçün 4 təyyarə, 6 helikopter, 24 su maşını və 220 nəfərlik heyət əraziyə cəlb olunub.

Alovlar Naldökən kəndində evlərə və tövlələrə ziyan vurub, çoxlu sayda heyvan tələf olub. Tuzla kəndindəki geotermal stansiyaya və tarixi Hüdavəndigar məscidinə də ziyan dəyib.

Təxminən 21 saat sonra yanğın nəzarətə götürülüb. Jandarm araşdırmasında hadisənin səbəbkarı kimi psixoloji problemi olan iki nəfər müəyyən edilib. Onlar saxlanılsalar da, daha sonra sərbəst buraxılıblar.

Türkan İsgəndərli