Yay mövsümündə zəhərlənməmək üçün nə etməliyik? – Mütəxəssis rəyi

Yay aylarında qida təhlükəsizliyi ilə bağlı risklər artır. 

Qida məsələləri üzrə mütəxəssis İlkin Şirinov TodayPress TV-yə açıqlamasında bildirib ki, əsasən ev şəraitində hazırlanan qidalar zəhərlənmələrə səbəb olur: 

“İnsanlar düşünürlər ki, qida evdə hazırlanıbsa, heç bir risk ola bilməz. Ancaq əksinə, ev şəraitində hazırlanan mayonezli salatlar, çiy ətdən hazırlanan yeməklər, kolbasa və sosislər sanitar qaydalara əməl olunmadıqda daha ciddi təhlükə yaradır”. 

Ekspert vurğulayıb ki, ən böyük problemlərdən biri də evdə sanitar normalara riayət olunmamasıdır: 

“Toyuq ətini kəsdiyimiz bıçaqla başqa bir məhsulu doğramaq, eyni kəsmə taxtasından istifadə etmək, çiy və bişmiş məhsulları bir yerdə saxlamaq bakteriya və mikroorqanizmlərin yayılmasına şərait yaradır. Xüsusilə evdə soyuducuların texniki vəziyyəti, məhsulların düzgün yerləşdirilməməsi və temperatur rejiminin pozulması qida zəhərlənmələrinin əsas səbəblərindəndir”.

O əlavə edib ki, süd məhsullarının bişirilmədən istifadəsi, konservləşdirilmiş balıq və kolbasa məhsullarının düzgün saxlanılmaması ciddi risk daşıyır. Bişmiş yeməklərin düzgün qablaşdırılmaması və isidilmə zamanı tam bişməməsi də zəhərlənməyə səbəb ola bilər. 

Mütəxəssis qeyd edib ki, otaq temperaturunda uzun müddət saxlanılan bişmiş yeməklər, düzgün yuyulmayan yumurta, çiy və bişmiş məhsulların soyuducuda eyni səviyyədə yerləşdirilməsi mal qonşuluğunun pozulmasıdır və bu da zəhərlənməni artıran faktorlardandır.

“İnsanlar evdə buz hazırlayır, amma istifadə etdikləri suyun təmiz olub-olmamasına fikir vermirlər. Eyni zamanda, buzun saxlandığı mühitin sanitar vəziyyəti də nəzərə alınmır. Yay aylarında insanlar daha məsuliyyətli davranmalı, sadə sanitar normalara əməl etməli, soyuducu və qida saxlanma şərtlərinə ciddi nəzarət etməlidirlər”, - deyə İlkin Şirinov fikrini yekunlaşdırıb.

Türkan İsgəndərli