Polşada 5500 illik “piramidalar” tapıldı

Polşanın Vişkoc kəndində aparılan arxeoloji qazıntılar zamanı “Polşa piramidaları” adlandırılan, neolit dövrünə aid iki nəhəng meqalitik qəbir aşkar edilib.

TodayPress TV xəbər verir ki, bu barədə "Archaeology News" məlumat yayıb.

Tapıntı Adam Mitskeviç Universitetinin arxeoloqları tərəfindən Hlapovski Landşaft Parkında aparılan rutin tədqiqat zamanı müəyyən olunub.

5500 il yaşı olan bu üçbucaq formalı tikililər həm regionda nadir, həm də Polşada indiyədək aşkar edilmiş ən böyük tarixəqədərki memarlıq nümunələrindən biri hesab olunur.

Qəbirlərin uzaqdan zondlama texnologiyası ilə aşkarlanması nəticəsində iki iri meqalitik struktura rast gəlinib. Bu, Polşada son yüz ildə cəmi üçüncü və dördüncü belə kompleksin tapılması deməkdir.

Arxeoloqlar qeyd edirlər ki, bu piramidaları inşa edən insanlar geniş məkan planlaşdırma biliklərinə malik olublar. Tikililərin yerləşmə forması onların dini dünyagörüşü və bəlkə də astronomik bilikləri ilə bağlı ola bilər.

Qazıntılar hələ başlanğıc mərhələsində olsa da, alimlər bu abidələrin erkən kənd təsərrüfatı cəmiyyətlərinin həyat tərzi, inam sistemi və elmi düşüncə tərzi haqqında mühüm məlumatlar verəcəyini hesab edirlər.

Qiymət Mahir