Rusiyalı alpinist həlak oldu

Rusiyalı alpinist Natalya Naqovitsınanın Qırğızıstanda yerləşən Qələbə zirvəsində həlak olduğu bildirilib. 

TodayPress TV xəbər verir ki, bu barədə məlumatı məşhur SHOT Teleqram kanalı yayıb.

Bildirilir ki, Naqovitsınanın cəsədi 7 min metr hündürlükdən yalnız hava şəraiti normallaşdıqdan sonra helikopter vasitəsilə endirilə biləcək. Həmçinin, rusiyalı alpinisti xilas etməyə çalışarkən həyatını itirən italiyalının cəsədini daşımaq üçün 4,5 min metr hündürlükdə fəaliyyət göstərən xilasetmə qrupu da geri çağırılıb.

Naqovitsına 11 gün ərzində -26 dərəcə şaxtada, yemək və susuz, yalnız qaz ocağı, yuxu torbası və cırıq çadırla “Quş” qayasının altında qalıb.

Avqustun 12-də 7 min metr yüksəklikdə ayağını sındıran Naqovitsınaya beynəlxalq komandadakı həmkarlarından biri ilkin tibbi yardım göstərib və kömək çağırmaq üçün düşərgəyə enib. Onu evakuasiya etməyə çalışan iki əcnəbi alpinistin cəhdi uğursuz olub. Nəticədə qadın yuxu torbasına bükülərək zirvədə qoyulub.

Rusiya Alpinizm Federasiyasının Klassik Alpinizm Komissiyasının sədri Aleksandr Yakovenko daha əvvəl bildirib ki, Tyan-Şan dağlarında aparılan xilasetmə əməliyyatında iştirak edənlər Naqovitsınanın sağ qalıb-qalmadığına əmin deyillər.

Namiq HUN