Qurban Qurbanov: “Azarkeşlər ÇL-in Liqa mərhələsini görməyi haqq edirdilər”
İdman
29.08.2025 09:10
“Qarabağ” klubunun baş məşqçisi Qurban Qurbanov əsas mərhələdə qarşılaşacağımız komandaların hamısının çox ciddi rəqiblər olduğunu bidirib.
TodayPress TV xəbər verir ki, o, UEFA Çempionlar Liqasının Liqa mərhələsinin püşkatmasını dəyərləndirərkən deyib:
“Rəqiblərimiz öz ölkələrinin köklü, tarixi olan klublarıdır. “Liverpul”, “Çelsi”, “Ayaks”, “Napoli”, həmçinin digərləri “Benfika”, “Ayntraxt”, “Kopenhagen” və “Atletik” hamının yaxşı tanıdığı güclü komandalardır. Çalışacağıq ki, bu matçlara yaxşı hazırlaşaq. Çünki bu turnir tam başqa bir səviyyədir. Çempionlar Liqasındakı həyəcan bir neçə dəfə artıq olur. Burada həm güc, həm sürət, həm oyunun gedişatı tam fərqlidir. Çox böyük məsuliyyət olduğunu başa düşürük. Yaxşı mübarizə aparmağa, azarkeşlərimizi sevindirməyə çalışacağıq. Bizim azarkeşlər Çempionlar Liqasının Liqa mərhələsini görməyi haqq edirdilər. Onlar üçün çox sevinirəm ki, bu mövsüm Çempionlar Liqasının minimum 4 görüşünü Bakıda canlı izləyəcəklər”.
Qeyd edək ki, "Qarabağ" Liqa mərhələsində “Çelsi” (İngiltərə), “Ayntraxt” (Almaniya), “Ayaks” (Niderland) və “Kopenhagen”lə (Danimarka) evdə, “Liverpul” (İngiltərə), “Benfika” (Portuqaliya), “Napoli” (İtaliya) və “Atletik”lə (İspaniya) səfərdə qarşılaşacaq.
Namiq HUN
tag: Qurban Qurbanov,Qarabağ,UEFA,Liqa,Todaypress.tv,