Kölgədə qalan GÜC: ABŞ-nin gizli ordusu DEVGRU

ABŞ Silahlı Qüvvələrinin ən elit xüsusi təyinatlı bölmələrindən biri olan DEVGRU rəsmi olaraq Naval Special Warfare Development Group adlanır və ictimaiyyətdə SEAL Team Six kimi tanınır. Bölmə Hərbi Dəniz Qüvvələrinin tərkibində fəaliyyət göstərir və birbaşa Joint Special Operations Command-a tabedir, bu da ona ABŞ-nin ən həssas və yüksək riskli əməliyyatlarını icra etmək səlahiyyəti verir.

DEVGRU 1981-ci ildə SEAL Team Six adı ilə yaradılıb və 1987-ci ildə DEVGRU adını alaraq yalnız əməliyyat icrası ilə məhdudlaşmayıb, həm də yeni taktika və texnologiyaların sınaqdan keçirildiyi mərkəzə çevrilib. Bölmə klassik hərbi strukturlardan fərqlənir: operatorlar geniş müstəqilliyə malikdir və əməliyyatlar çox zaman uzun müddət məxfi saxlanılır.

Bölmə bir neçə əsas eskadron və dəstədən ibarətdir:

Red Squadron – yüksək dəyərli hədəflərə hücum və terror liderlərinin zərərsizləşdirilməsi;

Blue Squadron – girovların azad edilməsi və yaxın döyüş əməliyyatları;

Gold Squadron – xarici gizli əməliyyatlar;

Silver Squadron – çevik hücum və ehtiyat vahid;

Black Squadron – kəşfiyyat və müşahidə;

Gray Squadron – dəniz əməliyyatları və bölmələrin yerləşdirilməsi;

Green Team – operatorların seçimi və hazırlanması.

Bu eskadronlar bir-birini tamamlayaraq DEVGRU-nu döyüş, kəşfiyyat və texniki dəstək üzrə tam funksional bölməyə çevirir.     

DEVGRU operatorları ən müasir silah və texnologiyalarla təchiz edilir, gecəgörmə, təhlükəsiz rabitə və real vaxt məlumat ötürülməsi imkanları əməliyyat effektivliyini artırır.

Hava və dəniz dəstəyi U.S. Special Operations Aviation və xüsusi katerlər vasitəsilə təmin olunur, bu da bölməyə qlobal miqyasda çevik hərəkət etmək imkanı verir.  

Bölmənin adı 2011-ci ildə Al-Qaeda lideri Osama bin Ladenin öldürülməsi əməliyyatından sonra dünyada məşhurlaşıb. 

DEVGRU-nun uğurlu əməliyyatları göstərir ki, müasir müharibədə kiçik, yüksək hazırlıqlı və texnoloji üstünlüklü xüsusi bölmələr həlledici rol oynayır.

Nicat Osman