GSG 9: Almaniyanın terrorla mübarizə strategiyasının əsas gücü

Almaniya terror təhdidlərinə qarşı dünyanın ən effektiv cavab mexanizmlərindən birini formalaşdıran ölkələrdən hesab olunur. Bu sistemin mərkəzində Federal Polisin elit xüsusi təyinatlı bölməsi olan GSG 9 (Grenzschutzgruppe 9) dayanır.

Bölmə 1972-ci il Münhen Olimpiadasında baş verən faciəvi terror aktından sonra yaradılıb. “Qara Sentyabr” təşkilatının hücumu nəticəsində 11 İsrail idmançısı, bir Alman polisi və beş terrorçu həlak olmuşdu.

Hadisə Almaniyanın təhlükəsizlik sistemində ciddi boşluqları üzə çıxardığından hökumət dərhal xüsusi təyinatlı qüvvənin formalaşdırılması qərarını verib. GSG 9 26 sentyabr 1972-ci ildə rəsmi olaraq təsis edilib və ilkin mərhələdə Sərhəd Mühafizə Qüvvələrinin tərkibində fəaliyyət göstərib.

Qrupun ilk komandiri Ulrix Vegener İsrailin Sayeret Matkal bölməsinin təcrübəsindən ilhamlanaraq elit dəstəni 180 nəfərlik heyətlə formalaşdırıb. GSG 9 dünya miqyasında şöhrəti isə 1977-ci ildə Lufthansa 181 təyyarəsinin qaçırılması zamanı Somalinin paytaxtı Moqadişuda keçirilən “Feuerzauber” əməliyyatı ilə qazanıb. Cəmi yeddi dəqiqə davam edən əməliyyat nəticəsində 90 girov azad edilib, terrorçular zərərsizləşdirilib və qrup beynəlxalq səviyyədə tanınıb.

Hazırda GSG 9 Almaniya Federal Polisinin (Bundespolizei) tabeliyində fəaliyyət göstərir və ölkənin daxili təhlükəsizlik strategiyasının əsas elementlərindən biri sayılır. Bölmə birbaşa Federal Daxili İşlər Nazirliyinə hesabat verir və əməliyyatlar federal səviyyədə təsdiqlənir.

Elit struktur dörd əsas əməliyyat bölməsindən ibarətdir: yerüstü əməliyyatlar (şəhər döyüşləri və antiterror missiyaları), dəniz əməliyyatları, hava əməliyyatları və texniki dəstək bölməsi. Bundan əlavə, kəşfiyyat, rabitə və təlim strukturları da fəaliyyət göstərir. Rəsmi heyət sayı açıqlanmasa da, müxtəlif mənbələrə görə bölmədə 250–500 nəfər xidmət edir.

GSG 9 yüksək texnoloji silah və avadanlıqlarla təchiz olunub. Arsenalda MP5 avtomatları, G36 hücum tüfəngləri, PSG1 snayper tüfəngləri, eləcə də termal kameralar, robot sistemlər və ballistik qoruyucu vasitələr yer alır. Qrup həmçinin qabaqcıl dronlar, gecəgörmə sistemləri və kiber təhlükəsizlik texnologiyalarından istifadə edir.

Bölmənin öz hava qüvvəsi olmasa da, Federal Polisin aviasiya bölməsi ilə sıx əməkdaşlıq edir və müxtəlif helikopterlərdən istifadə imkanına malikdir. GSG 9 Avropanın ATLAS xüsusi qüvvələr şəbəkəsinin üzvüdür və ABŞ, İsrail və Böyük Britaniya ilə birgə təlimlərdə iştirak edir.

Əməliyyatların əksəriyyəti məxfi saxlanılır, şəxsi heyətin kimliyi isə dövlət sirri kimi qorunur. Hazırda Almaniya xüsusi təyinatlı bölmənin imkanlarını genişləndirir — Berlində yeni təlim mərkəzi yaradılır və Şimal dənizində əlavə baza qurulur.

Bir sözlə, GSG 9 Almaniyanın terrora qarşı “gizli qalxanı” kimi qiymətləndirilir və qlobal təhlükəsizlik sistemində mühüm rol oynayır.

Nicat Osmanlı