VII FEMO International Beynəlxalq Olimpiadasının finalı keçirildi

Elm və Təhsil

04.06.2025 17:37

Azərbaycanın paytaxtında ibtidai sinif şagirdləri üçün ən böyük təhsil tədbirlərindən biri olan VII FEMO International Beynəlxalq Olimpiadasının final mərhələsi baş tutub. Tədbirin təşkilatçıları qismində Qazaxıstan Respublikasının Azərbaycandakı Səfirliyi, Qazaxıstanın Respublika Fizika-Riyaziyyat Məktəbi (RFRM) və Bakı şəhərinin Oxbridge Academy beynəlxalq məktəbi çıxış ediblər.

TodayPress TV xəbər verir ki, olimpiadanın bağlanış mərasimində çıxış edən Səfir Alim Bayel qeyd edib ki, bu tədbirin Bakıda keçirilməsi Qazaxıstanla Azərbaycan arasında mədəni-humanitar əlaqələrin möhkəmləndirilməsi yolunda növbəti addım olub. Diplomat Qazaxıstan təşəbbüsünə dəstək verilməsinə görə Azərbaycana təşəkkürünü bildirib.

FEMO Olimpiadası Qazaxıstanın layihəsidir və 1–5-ci sinif şagirdlərini bir araya toplayır. Bu layihənin məqsədi uşaqlarda riyaziyyata marağı artırmaq, həmçinin onlarda tədqiqat və məntiqi düşüncə bacarığını formalaşdırmaqdır. Layihə 2017-ci ildə Qazaxıstanda başlayıb və 2018-ci ildən beynəlxalq status qazanıb. Bu gün FEMO – onlarla ölkədən gələn gənc istedadların bir araya gəldiyi genişmiqyaslı bir platformadır.

FEMO International iştirakçıları iyirmidən artıq ölkəni təmsil edir. Bu ölkələr arasında Qazaxıstan, Azərbaycan, Gürcüstan, Özbəkistan, Qırğızıstan, Böyük Britaniya, ABŞ, Belarus, Türkiyə, Birləşmiş Ərəb Əmirlikləri, Səudiyyə Ərəbistanı, Tacikistan, Almaniya, Polşa, Fransa, İndoneziya, Rusiya və Kipr də var.

2025-ci ildə Bakıda keçirilən final mərhələsinə FEMO-nun qış və yaz turlarının qalibi və mükafatçısı olmuş 450-dən çox məktəbli qatılıb.