Yaponiyada torpaqdan 3D printerlə evlər tikilir

Yaponiyada torpaq, əhəng və təbii liflərdən istifadə edərək 3D printerlə evlər tikməyə başlayıblar.

TodayPress TV xəbər verir ki, bu layihəni yerli "Lib Work" tikinti şirkəti həyata keçirir.

Şirkət bildirir ki, bu materiallardan hazırlanan evlər əvvəlki sement əsaslı evlərdən beş dəfə daha möhkəmdir. Eyni zamanda, ətraf mühitə daha az ziyan vurur və karbon qazı emissiyalarını azaldır.

Ev tikiləcək yerdə əvvəlcə 3D printer qurulur, daha sonra evin divarları çap olunur. Sonra isə qapı, pəncərə və santexnika sistemləri quraşdırılır.

Bu evlərdə həm də günəş panelləri, batareya saxlama sistemi və nəmlik və temperaturu izləyən sensorlar olacaq.

Yeni növ evlərin satışı avqust ayında başlayacaq, qiyməti isə hələ açıqlanmayıb.

Türkan İsgəndərli