Paşinyanın xalqa müraciətində diqqət çəkən məqam: “Ermənistan cəmiyyəti hələ buna hazır deyil”

“Ermənistan Baş naziri Nikol Paşinyanın Vaşinqton görüşündən sonra xalqa müraciət etməsi, ümumilikdə, pozitiv və mühüm bir siqnal kimi qiymətləndirilə bilər”.

Politoloq Rizvan Hüseynov bunu TodayPress TV-yə danışarkən bildirib. 

Onun sözlərinə görə, məsələyə Azərbaycan prizmasından deyil, Ermənistanın daxili siyasi reallıqları baxımından yanaşdıqda, Paşinyanın xalqına bu görüş və əldə olunan razılaşmalarla bağlı müsbət mesajlar verməsi vacib idi:

“Paşinyan cəmiyyətinə izah etməli idi ki, sülhə zəmin yaranıb, razılaşma ehtimalı var və Zəngəzur dəhlizi ilə bağlı məsələlər həll mərhələsinə qədəm qoyub. O, bu prosesin nə qədər mühüm və faydalı olduğunu xalqa sübut etməli idi”.

Analitik diqqətə çatdırıb ki, Paşinyanın çıxışı zamanı referendum məsələsini gündəmə gətirməməsi məqsədəuyğun addım olub. Çünki bu məsələ Ermənistan cəmiyyətində hələ də həssas və qıcıq doğuran mövzu olaraq qalır: 

“Referendum məsələsinin indi ortaya atılması Paşinyan üçün əlavə daxili siyasi risklər yarada bilərdi. Onsuz da bu prosesin baş tutması üçün hələ azı bir il vaxt var. Belə bir həssas mərhələdə bu mövzunun səsləndirilməsi ictimai narazılığı artıra, müxalifəti aktivləşdirə bilərdi. Ona görə də bu addımdan yayınmaq Paşinyan üçün daha rasional qərar idi”.

O hesab edir ki, emosional və cəmiyyətdə parçalanma yarada biləcək mövzular yalnız uyğun siyasi zəmin formalaşdıqdan sonra müzakirəyə çıxarılmalıdır. Ermənistan hökumətinin əsas diqqəti isə bu mərhələdə sülh mesajlarını gücləndirməyə və daxili sabitliyi qorumağa yönəlməlidir: 

“Vaxtından əvvəl atılan addımlar və təşəbbüslər əksinə, daxildə müqaviməti gücləndirə, sabitliyi poza bilər”, - deyə R.Hüseynov fikrini sonlandırıb.

Qeyd edək ki, Ermənistanın Baş naziri Nikol Paşinyan avqustun 18-də xalqa müraciətində Vaşinqtonda keçirilmiş görüşlər və orada əldə olunan razılaşmalar barədə məlumat verib. O, avqustun 8-də imzalanmış Vaşinqton Bəyannaməsinə və paraflanmış sazişə əsasən, Ermənistan və Azərbaycanın 1991-ci il Almatı Bəyannaməsi əsasında bir-birinin ərazi bütövlüyünü və sərhədlərinin toxunulmazlığını tanıdığını açıqlayıb.

Paşinyan çıxışında Zəngəzur dəhlizi, regionda kommunikasiyaların açılması və normallaşma prosesi ilə bağlı fikirlər səsləndirsə də, referendum məsələsinə toxunmayıb.

Töhfə Səməd