Ərdoğan: "Ukrayna münaqişəsinin həllində dialoq vacibdir"

Türkiyə prezidenti Rəcəb Tayyib Ərdoğan bildirib ki, Ukrayna ilə bağlı yaranan münaqişənin həlli çox həssas məsələdir və tərəflərə təzyiq göstərməyə ehtiyac yoxdur. 

TodayPress TV xəbər verir ki, o, bu barədə Albaniyada keçirilən Avropa Siyasi Birliyinin sammitində danışıb.

Ərdoğan deyib ki, Türkiyənin əsas məqsədi hərtərəfli atəşkəsin əldə olunmasıdır. Onun sözlərinə görə, tərəfləri dialoqa təşviq etmək və danışıqları dəstəkləmək ədalətli və davamlı sülh üçün vacibdir.

Prezident bildirib ki, hazırda İstanbulda Türkiyənin Xarici İşlər Naziri Hakan Fidanın rəhbərliyi ilə Rusiya və Ukrayna nümayəndələri arasında danışıqlar gedir.

Bu danışıqlardan sonra Ukrayna prezidenti Volodimir Zelenski Rusiya ilə texniki səviyyədə müzakirələrə başlamaq qərarı verib.

Türkiyə lideri həmçinin əlavə edib ki, Türkiyə sülh üçün səylərini davam etdirəcək və bütün tərəfdaşların dəstəyinə ümid edir.

Türkan İsgəndərli