Qadınların pensiya yaşı dəyişə bilər? - Mövzu müzakirəyə çıxarıldı
Azərbaycanda qadınların pensiya hüquqları ilə bağlı müzakirələr davam edir. Belə ki, deputat Vüqar Bayramov Milli Məclisin plenar iclasında qadınların pensiya kapitalına xüsusi əmsalların tətbiq olunmasını və tək qadınların daha tez pensiyaya çıxmasına imkan yaradılmasını təklif edib.
Mövzuya münasibət bildirən sosioloq Üzeyir Şəfiyev TodayPress TV-yə bildirib ki, əlavə güzəştlərdən daha çox, qadınların övlad baxımı səbəbindən itirdiyi əmək stajı məsələsi həll edilməlidir.
Onun fikrincə, xüsusilə evdar və rəsmi işləməyən qadınların uşağa baxdığı illər pensiya hesablanarkən nəzərə alınmalıdır:
"Deputatın səsləndirdiyi təklifləri tam bölüşmürəm. Amma hesab edirəm ki, qadınların uşağa baxdığı dövr, ən azı uşağın 3 yaşı tamam olana qədər olan müddət əmək stajı kimi qəbul edilməlidir. Bu, xüsusilə işləməyən evdar xanımların gələcəkdə pensiya hüququ əldə etməsi baxımından vacibdir".
Sosioloqun sözlərinə görə, Azərbaycanda minlərlə qadın ailə və övlad məsuliyyətinə görə əmək bazarından kənarda qalır və nəticədə yaşlı dövrdə sosial təminat problemi ilə üzləşir:
"Bu qadınlar faktiki olaraq cəmiyyət üçün sosial missiya yerinə yetirirlər. Övlad böyütmək, ailəyə qayğı göstərmək böyük sosial yükdür. Amma rəsmi əmək fəaliyyəti olmadığı üçün onların pensiya hüquqları formalaşmır. Halbuki həmin müddətin staj kimi tanınması sosial ədalət baxımından daha doğru yanaşma olar".
Ekspert hesab edir ki, belə mexanizm həm qadınların gələcək sosial müdafiəsini gücləndirər, həm də ailə institutunun qorunmasına müsbət təsir göstərə bilər.
Qeyd edək ki, Azərbaycanda 2026-cı iyulun 1-dən qadınların pensiya yaşı 65 olacaq.
Türkan İsgəndərli
