“Fransa Ermənistanı xilas etməyəcək!” – Kartlar AÇILDI

“Ermənistan hakimiyyəti hədəflərinə çatmaq və Avro-Atlantik məkana inteqrasiya üçün Fransanın dəstəyinə ümid edir”.

Politoloq Əli Orucov bunu TodayPress TV-yə açıqlamasında deyib. 

O bildirib ki, Fransa ilə Ermənistan arasında sıx əməkdaşlıq mövcuddur və Paris İrəvanın əsas himayədarlarından biridir:

“Makron öz sələflərindən fərqli olaraq daha ifrat ermənipərəst mövqe nümayiş etdirdiyi üçün Yelisey Sarayının Azərbaycanla münasibətlərində gərginliklər yarandı. Bu da Fransanı Cənubi Qafqazda ciddi itkilər və ağır zərbələrlə üz-üzə qoydu. Bakının demarşı və neokolonializmə qarşı atdığı effektiv addımlar Parisin beynəlxalq nüfuzuna ciddi zərbə vurdu, xüsusilə də onun dənizaşırı bölgələrində çətinliklər yaratdı”.

Ekspert əlavə edib ki, 8 avqustda Ağ Evdə ABŞ Prezidenti Donald Trampın iştirakı ilə Azərbaycan Prezidenti İlham Əliyev və Ermənistanın Baş naziri Nikol Paşinyan arasında əldə edilən razılaşmalar, eləcə də Zəngəzur dəhlizinin açılması istiqamətində maneələrin aradan qaldırılması Parisin mövqeyində müəyyən yumşalma yaratdı:

“Bununla belə Fransanın Cənubi Qafqazda sülh və təhlükəsizlik naminə çalışdığını söyləmək çətindir. Çünki həmin ölkə Ermənistana hərbi, siyasi, maliyyə və digər dəstəklərini birtərəfli qaydada davam etdirir, onu yüksək dəqiqlikli silah-sursat və hərbi texnika ilə təchiz edir.

Fransa istər ATƏT-in Minsk Qrupu həmsədrlik dövründə, istər 44 günlük müharibədə, istərsə də ondan sonrakı mərhələdə Ermənistan–Azərbaycan münasibətlərinin normallaşmasına heç bir töhfə verməyib. Əksinə, prosesləri qızışdırıb, işğalçılığı dəstəkləyib və Azərbaycana qarşı açıq-aşkar düşmən mövqeyi sərgiləyib. Ermənistan isə diplomatik müstəvidə əlini gücləndirmək, müttəfiq və tərəfdaşlarının dəstəyini artırmaq niyyətindədir. Buna baxmayaraq, indiyədək Azərbaycan diqtə edən tərəf kimi üstün mövqeyini qoruyub”.

Ə.Orucov, həmçinin əlavə edib ki, avqustun 8-dən sonra İrəvan ənənəvi tərəfdaşları olan İran və Rusiyanın hiddətini üzərinə çəkdi:

“Paşinyan yaxşı anlayır ki, Moskva onu rahat buraxmayacaq. Hərtərəfli basqılar fonunda Ermənistan hakimiyyəti qarşısına qoyduğu hədəflərə çata və götürdüyü öhdəlikləri yerinə yetirə bilmir. İrəvan bu hədəflərə çatmaq və Avro-Atlantik məkana inteqrasiya üçün Fransanın dəstəyinə ümid edir. Lakin bunun nə dərəcədə reallaşacağı sual altındadır. Çünki Ermənistan Ankara və Bakı ilə dil tapa bilməsə, diplomatik münasibətlər qura bilməsə, onun Fransanın dəstəyi ilə xilas olacağına inanmaq absurddur. Azərbaycan isə təşəbbüsü heç bir halda əldən verməyəcək”.

Qeyd edək ki, sentyabrın 16-da Parisdə Ermənistan və Fransa XİN arasında siyasi məsləhətləşmələr keçirilib.

İqtisadiyyat, infrastruktur, müdafiə və mədəniyyət sahələrində əməkdaşlıq, beynəlxalq təşkilatlar çərçivəsində birgə fəaliyyət, eləcə də Ermənistan–Aİ tərəfdaşlığının gündəliyi müzakirə olunub.

Tərəflər Ermənistan–Fransa strateji tərəfdaşlıq sənədinin imzalanma müddəti, regional və beynəlxalq məsələlər, o cümlədən Ermənistan–Azərbaycan razılaşmaları və Ermənistan–Türkiyə münasibətlərinin normallaşdırılması prosesinə də toxunublar.

Qiymət Mahir

TodayPress TV