Ekspert: "Universitetlər bazarın tələbinə uyğun ixtisaslaşma apara bilmir"

"Bəzi universitetlərdə tədris proqramları beynəlxalq standartlara cavab vermir. Bu isə məzunların əmək bazarında çətinliklərlə üzləşməsinə səbəb olur".

Bu sözləri TodayPress TV-yə təhsil eksperti Məzahir Məmmədli bildirib.

Onun sözlərinə görə, hazırda Azərbaycandakı ali təhsil müəssisələrində ixtisaslar və fənlər üzrə real monitorinqlər aparılmır, nəticələr qiymətləndirilməyib:

"Bu qənaətə ona görə gəlinir ki, ali təhsil müəssisələrindən məzun olan şəxslər əmək bazarında özlərinə uyğun iş tapa bilmirlər. Bu isə o deməkdir ki, universitetlər ixtisaslaşmanı və fənn seçimini bazarın tələbinə uyğun qura bilmirlər. Ən yaxşı halda region ölkələri ilə müqayisə etsək, Qazaxıstan universitetləri bizdən xeyli öndədir. Hətta texniki ixtisaslarda Ermənistan və Gürcüstan da müəyyən sahələrdə bizdən qabaqdadır".

Ekspert qeyd edib ki, universitetlər məzunları əmək bazarına hazır vəziyyətdə çıxara bilmirlər:

"Məsələn, İT ixtisası üzrə təhsil alan tələbələr 6 il oxusalar da, mükəmməl proqram biliklərinə sahib olmurlar. Məzunlar əlavə kurslara gedir, özlərini inkişaf etdirməyə çalışırlar. Bu da göstərir ki, universitetlər tədris prosesində müasir tələbləri yerinə yetirə bilmirlər. Yeni nəsil alimlik və pedaqoji fəaliyyət sahəsində maraq göstərmir. Yaşlı müəllimlərin üzərinə yük düşür, bu da sistemin inkişafını ləngidir. Sosial təminatlar və rifah yaxşılaşdırılmasa, gəncləri elmə və tədrisə cəlb etmək mümkün olmayacaq. Gənc kadrların yetişdirilməsi və universitetlərdə yenilənmə prosesi zəruridir".

Məzahir Məmmədli vurğulayıb ki, təhsil müəssisələrinin beynəlxalq standartlara uyğunlaşdırılması, əmək bazarına inteqrasiya olunmuş proqramların tətbiqi və gənc kadrların dəstəklənməsi təhsilin keyfiyyətini artırmaq üçün əsas istiqamətlərdən olmalıdır.

Türkan İsgəndərli

TodayPress TV