Qəzzada 40 mindən çox uşaq aclıqdan əziyyət çəkir

İsrailin tətbiq etdiyi blokada və aclıq siyasəti nəticəsində 2,4 milyon insan, o cümlədən 1,2 milyondan çox uşaq ciddi təhlükə altındadır.

TodayPress TV xəbər verir ki, bu barədə Qəzzadakı hökumətə bağlı media ofisi məlumat yayıb.

Açıqlamaya görə, Qəzza zolağında bir yaşına çatmamış 40 mindən çox körpə ağır qida çatışmazlığı səbəbilə ölüm riski ilə üzləşib. Ümumilikdə 100 mindən çox uşaq və xəstə humanitar fəlakətin astanasındadır.

Qida məhsulları, uşaq qidaları və digər vacib ərzaqların bölgəyə girişinə icazə verilmədiyi və məhdud humanitar yardımın belə çox vaxt oğurlandığı və ya təhlükəli şəkildə paylandığı qeyd olunub.

Ərəb və İslam ölkələrinə, beynəlxalq ictimaiyyətə və BMT agentliklərinə çağırış edilib ki, Qəzzaya humanitar yardım çatdırmaq, sərhəd keçidlərini açmaq və blokadanı aradan qaldırmaq üçün İsrailə qarşı təsirli addımlar atsınlar.

Türkan İsgəndərli