Livan və Suriyada mənzil böhranı dərinləşir
“Livan və Suriyada münaqişələrin təsiri mənzil və yaşayış xərclərini daha da ağırlaşdırıb”.
TodayPress TV xəbər verir ki, bunu WUF13 çərçivəsində keçirilən “Yaxın Şərq böhranı və onun qlobal mənzil və şəhərsalma sahəsinə təsirləri” adlı tədbirdə BMT-nin Məskunlaşma Proqramının (UN-Habitat) təmsilçisi Filip Dekorte deyib.
O bildirib ki, Livanda hazırda genişmiqyaslı məcburi köçkünlük davam edir və köçkünlərin böyük hissəsi kollektiv mərkəzlərdə deyil, özəl kirayə bazarında yerləşdirilir.
“İnsanların təxminən 50 faizi özəl bazarda kirayədə yaşayır. Bu ailələr uzun müddət köçkün qalacaqlarını gözləmirdilər və artıq planlaşdırdıqlarından daha uzun müddət kirayə ödəmək məcburiyyətində qalıblar. Enerji qiymətlərinin artması kirayə haqlarını daha da yüksəldib. Livandakı münaqişə və Beyrut partlayışından sonra elektrik sisteminin çökməsi insanları generatorlardan istifadəyə məcbur edib və yanacaq qiymətlərinin artımı vəziyyəti daha da ağırlaşdırıb”.
“UN-Habitat” təmsilçisi bildirib ki, əvvəllər Livan hökuməti evlərinə qayıdan ailələrə yenidənqurma üçün maliyyə yardımı edirdi. Lakin beynəlxalq maliyyə böhranı səbəbindən artıq bu dəstəyin təmin olunması çətinləşib.
“Tikinti xərcləri artır, amma mövcud maliyyə azalır. Bu isə böhranın təsirlərini daha da ağırlaşdırır”, – deyə Filip Dekorte qeyd edib.
O, həmçinin Suriyada hökumətin insanları düşərgələrdən çıxarıb evlərinə qaytarmaq üçün yeni yanaşmalar üzərində işlədiyini bildirib.
Filip Dekortenin sözlərinə görə, Dəməşq ətrafındakı bəzi yaşayış məhəllələri tamamilə dağıdılıb və hazırda əsas diqqət mənzil və mülkiyyət məsələlərinin həllinə, zərərin qiymətləndirilməsinə və ailələrin yenidənqurma prosesinə dəstək göstərilməsinə yönəlib.
O əlavə edib ki, ailələrin evlərini bərpa etməsi üçün mikro maliyyə mexanizmlərindən daha geniş istifadə imkanları nəzərdən keçirilir.
Qiymət Mahir
