"Bibiheybət" Gəmi Təmiri Zavodunda hasil edilən enerjinin həcmi açıqlandı

Ötən ilin oktyabrında “AZCON Holding” şirkətlərindən olan “Azərbaycan Xəzər Dəniz Gəmiçiliyi” QSC-nin (ASCO) “Bibiheybət” Gəmi Təmiri Zavodunda quraşdırılmış günəş panelləri vasitəsilə indiyədək 66 215,3 kVt/saat enerji hasil edilib.

TodayPress TV ASCO-ya istinadən xəbər verir ki, təkcə 2025-ci ilin may ayı ərzində 18 454,3 kVt/saat enerji istehsal olunub. Ay ərzində bəzi günlərdə hasilat 800 kVt/saat həddinə yaxınlaşıb.

Statistikaya görə, indiyədək 65 946,1 kq karbon qazı emissiyasının qarşısı alınıb. Bu isə 3 638 ağacın qorunmasına bərabər ekoloji fayda deməkdir. Eyni zamanda, 26 457,8 kq daş kömürə qənaət olunub ki, bu da enerji istehsalında fosil yanacaqlardan istifadəni minimuma endirir.

Qeyd edək ki, “Bibiheybət” Gəmi Təmiri Zavodunda ümumilikdə 512 kvadratmetr əraziyə hər biri 690 Vt olmaqla, 162 ədəd günəş paneli quraşdırılıb.