“ChatGPT-5" təqdim olunacaq: Üstünlükləri nələrdir?

“OpenAI"nin yeni modeli “GPT-5” süni intellektin sərhədlərini genişləndirir. 

TodayPress TV xəbər verir ki, bu barədə “TRT Haber” məlumat yayıb. 

Bildirilib ki, “OpenAI”nin növbəti nəsil süni intellekt modeli olan “GPT-5”, təkcə söhbət botu olmaqdan kənara çıxaraq sürət, məntiq və çox yönlülük baxımından süni intellektin yeni mərhələsini başlatmağa hazırlaşır.  

Məlumata görə, “GPT-5" avqust ayında təqdim olunacaq. 

Hazırda istifadəçilərin əksəriyyəti “GPT-4o” modelindən yararlanır. “OpenAI” bu modeli əksər tapşırıqlar üçün yetərli hesab etsə də, “GPT-5” ilə bağlı gözləntilər daha yüksəkdir.  

Məlumata görə, “GPT-5" fərqli alətlər arasında keçid ehtiyacını aradan qaldıracaq. Görüntü yaratma, kod çevirmə, məlumat emalı və internetdə araşdırma kimi funksiyalar eyni platformada birləşdiriləcək. Beləliklə, yeni model təkcə dialoq aparan sistem deyil, çoxmodlu məhsuldarlıq platforması funksiyası daşıyacaq. 

Ən çox gözlənilən yeniliklərdən biri də böyük kontekst pəncərəsi olacaq. Bu funksiya vasitəsilə model tək bir sessiyada daha çox məlumatla işləyə biləcək. Bu isə uzun mətnlərin yazılması, hüquqi sənədlərin təhlili və mürəkkəb proqramlaşdırma layihələri kimi sahələrdə istifadəçilərə böyük imkanlar yaradacaq. 

Aysel Mətləb