Makron: "Rusiya bundan imtina edərsə, sanksiyalar gücləndiriləcək"

"Avropa və ABŞ Moskvanın Ukraynaya qarşı müharibənin dayandırılması ilə bağlı danışıqlardan imtina etməyə davam edəcəyi təqdirdə Rusiyaya qarşı sanksiyaları gücləndirmək barədə razılığa gəliblər".

TodayPress TV "RBC-Ukrayna"ya istinadən xəbər verir ki , bu barədə Fransa prezidenti Emmanuel Makron “həlledici koalisiya”nın iclasından sonra keçirilən mətbuat konfransında bildirib.

Makron bildirib ki, Avropa və ABŞ Ukrayna və Rusiya arasında liderlər səviyyəsində görüş keçirməyə çağırır.

"Rusiya konkret sülh danışıqlarından imtina etməyə davam edərsə, o zaman biz Amerika Birləşmiş Ştatları ilə birlikdə əlavə sanksiyalar tətbiq edəcəyik və rəliləyiş istəməməsinə aydın cavab verəcəyik", - Makron bildirib.

O qeyd edib ki, Qərb dövlətlərinin məqsədi Ukraynanın öz hüquqlarını bərpa etməsi, təcavüzün mükafatlandırılmaması, beynəlxalq hüququn pozulmasının heç bir formada təsbit edilməməsidir.

Makron ABŞ prezidenti Donald Trampın Macarıstan və Slovakiyanın Rusiya neftini almağa davam etməsindən narahatlığını ifadə etdiyini də təsdiqləyib.

"Hesab edirəm ki, bu, yaxşıdır, çünki bəzən bu ölkələr Amerikanın yeni administrasiyasının yaxınlığını əsas gətirərək özlərinə haqq qazandırırdılar. Ona görə də ABŞ və Avropanın hərəkətlərinin əlaqələndirilməsi bu təcrübənin sonunu xeyli səmərəli edəcək", - o əlavə edib.

Makron bildirib ki, “həlledicilər koalisiyasının” görüşü zamanı həm ilkin (Rusiya iqtisadiyyatına qarşı), həm də ikinci dərəcəli sanksiyalar (Rusiyaya məhdudiyyətlərdən yayınmağa kömək edən ölkələrə qarşı) müzakirə edilib. Bu məsələ ilə bağlı iş texniki formatda aparılacaq.