Kitab sərgisinin son günləri: Müəlliflər və naşirlər fikirlərini bölüşür

Son bir həftədə ölkənin mədəni gündəmini təşkil edən məsələ XI Bakı Beynəlxalq Kitab Sərgisidir. 

Hər il keçirilən sərgi bu il də müxtəlif kitablar, ədəbi panellərlə yadda qaldı. 

Bəs müəlliflər, naşirlər sərgi ilə bağlı nə düşünür?

“Hər şey yüksək səviyyədədir”

Bu sözləri TodayPress TV – yə sərginin fəxri yazarı, şair, esseist, tərcüməçi Qismət Rüstəmov bildirib.

O, bu barədə deyib:

“Sərginin birinci günündə də dediyim kimi, təşkilatçılıq yüksək səviyyədədir. Artıq son günlərdir. Çox yaxşı haldır ki, bu ənənə hər il davam edir və davam etməsini də istəyərdik. Üstəlik, ildən-ilə hər məsələdə artım da müşahidə etmək olur. Məsələn, bu il stendlərin də sayı artıb, nəşriyyatların da. Bu da özlüyündə görülən işlərin keyfiyyətindən xəbər verir”. 

Park nəşriyyatının direktoru, yazıçı Vüqar Van da fikirlərini bölüşüb.

“Biz “Park nəşriyyatı” olaraq bu cür sərgiyə ilk dəfədir qatılırıq. Əlbəttə, nəşriyyatımız da yenidir. İlk günlər satış zəif olsa da, sona doğru, xüsusilə bazar günü oxucuların axını oldu. Yeni kitablarımızı təqdim etdik, panellərdə iştirakımız da baş tutdu”.

“Kosmo nəşriyyatı”nın təsisçisi İlkin Abdullayev isə həm də narazılığını da bildirib.

O, sərginin ilk günündə oxucuların bir qisminin gəlməkdə çətinlik çəkdiyini bildirib:

“Deyəsən, avtobusların hər il dayandığı ənənəvi yerlər dəyişmişdi. Daha dəqiq, Elmlər ərazisindən gələn oxucular çətinlik çəkdiklərini, buna səbəb olaraq isə avtobusların yerinin dəyişdiyini deyirdilər. Qalan hər şey yaxşıdır, ümid edirik, gələn il daha da yaxşı olacaq”.

Son olaraq isə sabiq fəxri yazar, şair Şəhriyar del Gerani də fikirlərini saytımıza bölüşüb.

“Həmkarım, əziz dostum Qismət Rüstəmovu, o cümlədən Rüstəm Behrudini təbrik edirəm. Əlavə olaraq, Mədəniyyət Nazirliyinə, şəxsən nazir Adil Kərimliyə belə gözəl təşkilatçılıq üçün təşəkkür edirəm. Allah necə haqdı?!”

Xatırladaq ki, XI Bakı Beynəlxalq Kitab Sərgisinin fəxri yazarları şair Rüstəm Behrudi və şair-esseist, tərcüməçi Qismət Rüstəmovdur. 

Orxan Saffari

TodayPress TV