FIFA ofsayd anlayışını yenidən yazır

FIFA 2026-cı il dünya çempionatından əvvəl ofsayd qaydasına dəyişiklik edə bilər. 

TodayPress TV xəbər verir ki, bu barədə Mundo Deportivo nəşri məlumat yayıb.

Söhbət “Venger qanunu” kimi tanınan qaydadan gedir. Onun müəllifi FIFA-nın dünya futbolunun inkişafı üzrə direktoru vəzifəsində çalışan Arsen Vengerdir.

Onun təşəbbüsünə əsasən, ofsayd yalnız hücumçu ilə müdafiəçi arasında açıq məsafə olduqda qeydə alınacaq. Əgər oyunçular eyni xətt üzərindədirsə - hətta qismən, məsələn, hücumçunun dabanı müdafiəçinin ayağının üstü ilə eyni səviyyədədirsə - ofsayd sayılmayacaq.

Oktyabrın sonu və ya noyabrda 23 oyunçu və 11 hakimdən ibarət ekspertlər komitəsi yeni təklifləri nəzərdən keçirəcək. Ən maraqlısı odur ki, bu komitəyə təşəbbüsün müəllifi - Venger özü rəhbərlik edir. 

İdeya bu mərhələdən keçsə, o, yanvarın 20-də keçiriləcək illik iclasa, daha sonra isə fevralın sonu və ya martın əvvəlində təşkil olunacaq ümumi toplantıya çıxarılacaq. 

Qeyd edək ki, yeni qayda artıq 2026-cı ildə - dünya çempionatı ərəfəsində sınaqdan keçirilə bilər.

Namiq HUN

TodayPress TV