Türkiyə və Pakistan əməkdaşlığı genişləndirmək niyyətindədir

Türkiyə prezidenti Rəcəb Tayyib Ərdoğan İstanbulda Pakistanın Baş naziri Şahbaz Şəriflə keçirdiyi görüş zamanı iki ölkə arasında illik ticarət dövriyyəsini 5 milyard dollara çatdırmaq niyyətində olduqlarını bildirib.

TodayPress TV xəbər verir ki, görüş Dolmabağça prezident aparatında baş tutub.

Türkiyə Prezident Administrasiyasının verdiyi məlumata görə, danışıqlarda ikitərəfli münasibətlərlə yanaşı, regional və qlobal məsələlər də müzakirə olunub. Ərdoğan bildirib ki, iki ölkə enerji, nəqliyyat, müdafiə və terrorla mübarizə sahələrində əməkdaşlığı daha da gücləndirmək istəyir.

Pakistan Baş nazirinin Türkiyəyə səfəri əvvəlcədən elan olunmayıb. Bu səfər və aparılan danışıqlar iki ölkə arasında strateji tərəfdaşlığın daha da möhkəmləndirilməsi istiqamətində atılan addımlardan biri hesab olunur.