Makronun reytinqi tarixi minimuma düşdü: İstefası tələb olunur

Fransa prezidenti Emmanuel Makronun populyarlıq səviyyəsi prezidentliyi dövründə rekord səviyyədə aşağı düşüb.

TodayPress TV xəbər verir ki, "Le Figaro Magazine" jurnalında yayımlanan "Verian" sosioloji xidmətinin araşdırmasına görə, yalnız 15% fransız onun fəaliyyətini dəstəkləyir.

Makrona inamsızlıq səviyyəsi 80%-ə çatıb ki, bu da onun 2017-ci ildə prezident seçilməsindən bəri ən pis göstəricidir. Hətta bu rəqəm 2018-ci ildəki “sarı jiletlilər” etirazları zamanı qeydə alınan 20%-lik dəstəyi də geridə qoyub.

Baş nazir Fransua Bayrunun reytinqi isə daha da aşağıdır – onun fəaliyyətini cəmi 14% respondent dəstəkləyir, 82% isə mənfi qiymətləndirir. Sorğu internet vasitəsilə 18 yaşdan yuxarı 1000 nəfər arasında keçirilib.

Qeyd edək ki, sentyabrın 1-də məlum olub ki, solçu “Əyilməyən Fransa” partiyası, hökumətə etimad səsverməsindən bir gün sonra parlamentdə Makronun istefası ilə bağlı təşəbbüs irəli sürməyi planlaşdırır. Kabinetə etimad səsverməsi 8 sentyabra təyin edilib.

Töhfə Səməd

TodayPress TV