Azərbaycanda evlənmək neçəyə başa gəlir? - ARAŞDIRMA

Toy həm ailələr üçün sevinc, həm də büdcə baxımından ciddi məsuliyyət deməkdir. Restorandan tutmuş xonçalara qədər hər detal xüsusi xərc tələb edir.  

Maraqlıdır Azərbaycanda bir toy neçəyə başa gəlir?

TodayPress TV toy qiymətlərini araşdırıb.

Məlub olub ki, toy prosesində ən böyük xərclər, şadlıq saraylarına aiddir. Belə ki, hazırda Bakıda orta səviyyəli toy üçün menyu qiymətləri adambaşı 35 - 150 manat arasında dəyişir. 150 nəfərlik bir toy etmək üçün restoran və xidmət xərcləri 7000 - 22 500 manat aralığında olur. 

Təbii ki, daha da bahalı restoranlara rast gəlmək mümkündür.

Xərclərin əsas hissələrindən biri də qızıla aiddir. Araşdırmalarımıza görə, qızıl dəstləri orta hesabla 3000 - 10 000 manat aralığındadır.

Qeyd edək ki, hazırda 1 qram qızılın qiyməti təxminən 120 - 130 manat civarındadır. 

Toy mərasimlərinin ayrılmaz hissəsi olan xonçaların da qiyməti ucuz deyil. Müxtəlif dizaynda hazırlanan xonçaların qiyməti 10 manatdan başlayaraq 50 manata qədər yüksəlir. Təbii ki, bu da oğlan evi və qız evi, eləcə də adətlərə görə dəyişir. 

Həri, nişan, gəlin xonçasını hesablasaq, ümumilikdə  xərc 300 - 1500 təşkil edir. Təbii ki, xonçalar boş getmir. Onların içini geyimlər, aksessuarlar, kosmetik vasitələr, şirniyyatlar və başqa ləvazimatlarla doldurmaq lazımdır. Bu da hər bir ailənin cibinə görə dəyişir. Bəziləri bahalı markalara üstünlük verərkən, bəziləri daha sərfəli məhsullara üz tutur.

Şad günlərin əyləncə və yaddaş hissəsi də az xərc tələb etmir. Müğənni və tamada 500 - 2500 AZN, foto/video çəkiliş 700 - 2000 AZN, gəlin maşını və dekorasiyası 300 - 800 AZN, rəqs qrupu, mələklər və effektlər 500 - 1500 AZN-dir. Bütün bunlar istəyə görə dəyişə bilər.

Gəlin deyəndə ağıla ilk gələnlər gəlinlik saç və makiyaj və cehizlərdir. 

Gəlinliklərin kirayə qiyməti keyfiyyət və modelə görə dəyişir. Sadə gəlinliklər 250 manatdan başlayır, lüks modellər isə 5000 manata qədər təklif olunur. 

Saç-makiyaj xidmətlərinin qiyməti 300 - 800 manat arasında dəyişir. Bu xərclər də adətlərə görə dəyişir. Bəzən oğlan evi, bəzən də qız evi ödəyir.

Cehizlərlə bağlı vəziyyət isə belədir: Mətbəx əşyaları, elektrik avadanlıqları və digər gündəlik istifadə olunacaq əşyalar alınır ki, onların da ümumi qiyməti 2000 - 5000 manat arasında dəyişir. Zal, yataq, mətbəx mebellərinin qiyməti isə orta hesabla 5000 - 20 000 manat təşkil edir. 

Ayrılıqda götürsək, Azərbaycanda bir toyun başa gəlməsi üçün minimum 14 900 – 71 800 manat arası xərc tələb olunur. 

Türkan İsgəndərli