Hikmət Hacıyev: Qarabağdan erməniləri biz çıxarmamışıq, bu onların öz qərarı olub

“Hazırda Qarabağ və Şərqi Zəngəzurda 50 min nəfərdən çox azərbaycanlı yaşayır, təhsil alır və əmək fəaliyyəti ilə məşğul olur. Biz hər zaman öz evlərimizə qayıtmağı arzulamışıq. Yanaşmamız layiqli və təhlükəsiz qayıdışın təmin olunmasından ibarətdir”.

TodayPress TV xəbər verir ki, bunu Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev Almaniyanın “Berliner Zeitung” nəşrinə müsahibəsində bildirib.

Qarabağda həyata keçirilən genişmiqyaslı tikinti-bərpa işlərindən bəhs edən Hikmət Hacıyev söyləyib ki, bu region hazırda böyük bir tikinti meydançasını xatırladır:

“Azərbaycan xalqı tarixən öz ölkəsinə bağlı olan bir xalqdır. Biz hər zaman evlərimizə qayıtmağı arzulamışıq. Yanaşmamız layiqli və təhlükəsiz qayıdışın təmin olunmasından ibarətdir. Gördüyünüz kimi, Qarabağ regionu böyük bir tikinti meydançasıdır. Qarabağ və Şərqi Zəngəzurda 50 min nəfərdən çox azərbaycanlı yaşayır, təhsil alır və əmək fəaliyyəti ilə məşğul olur”.

Hikmət Hacıyev jurnalistin vaxtilə Qarabağda yaşamış erməni sakinlərin yenidən bu bölgəyə qayıdış imkanları ilə bağlı sualı da cavablandırıb.

Prezident köməkçisi xüsusilə vurğulayıb ki, Azərbaycan ərazisini tərk etmək onların öz qərarı olub:

“Birincisi, Qarabağdan erməniləri biz çıxarmamışıq. Getmək qərarı onların özü tərəfindən verilib. İkincisi, Azərbaycan kifayət qədər kompleks bir reinteqrasiya planı hazırlayıb, lakin ermənilər bu plandan imtina edib. Bu plan nə deməkdir? Azərbaycan vətəndaşlığını qəbul etmək, Azərbaycan vətəndaşları ilə loyal şəraitdə, Azərbaycan Respublikasının Konstitusiyası və qanunları çərçivəsində yaşamaq. Bu, istənilən bir dövlət üçün tamamilə normaldır. Azərbaycan öz ərazilərinin ziqzaqvari formada dəyişdirilməsi ilə heç vaxt barışa bilməz. Bu məsələ qapadılıb. Azərbaycan vətəndaşı qismində yaşamaq istəyənlər üçün isə müvafiq prosedurlar mövcuddur”.

Prezident köməkçisi Qarabağ ermənilərinin bu ərazini tərk etməsinin “etnik təmizləmə” kimi qələmə verilməsi ilə razılaşmadığını diqqətə çatdırıb:

“Qarabağ ermənilərinin bu ərazini könüllü şəkildə tərk etməsini etnik təmizləmə adlandırmaq olmaz. Lakin əgər biz qayıdış hüququndan danışırıqsa, o zaman onilliklər boyunca Ermənistan ərazisində yaşayan və oradan zorla çıxarılan azərbaycanlılardan da bəhs etməliyik. Qayıdış hüququ II Dünya müharibəsindən sonra məsələn, elə Almaniyanın özündə geniş şəkildə müzakirə olunan mövzudur. Bu, insan hüquqlarından biridir və Ermənistandan qovulan 250 min nəfər azərbaycanlıya münasibətdə də tətbiq edilməlidir. Sözsüz ki, onların da qayıtmaq hüququ var, lakin İrəvan bu barədə danışmaqdan imtina edir”.