Zəhərsiz arıların balı antibakterial xüsusiyyətə malikdir

Sidney Universitetinin alimləri tərəfindən aparılan araşdırma nəticəsində Avstraliyada yaşayan Tetraqonula karbonaria, Tetraqonula hokinqsi və Avstroplebeia australis növ zəhərsiz arıların istehsal etdiyi balın güclü antibakterial xüsusiyyətlərə malik olduğu müəyyən edilib. 

TodayPress TV xəbər verir ki, tədqiqatın nəticələri “Applied and Environmental Microbiology” jurnalında dərc olunub.

Alimlər bildiriblər ki, bu bal növləri digər arıların istehsal etdiyi ənənəvi ballardan fərqli olaraq, həm hidrogen peroksid, həm də sabit, qeyri-peroksid antibakterial komponentlər sayəsində mikroorqanizmlərə qarşı daha davamlı təsir göstərir. Üstəlik, bu bal isidildikdən və uzun müddət saxlandıqdan sonra belə öz müalicəvi xüsusiyyətlərini qoruyur.

Mütəxəssislər hesab edirlər ki, bu cür davamlı antibakterial aktivlik xüsusilə antibiotiklərə qarşı artan müqavimətə qarşı mübarizədə təbii alternativ kimi mühüm rol oynaya bilər.

Lakin müalicəvi xüsusiyyətlərə baxmayaraq, bu balın illik istehsal həcmi çox azdır. Belə ki, hər pətəkdən cəmi yarım litr bal əldə olunur. Bununla belə, arıların sancmaması və az qulluq tələb etməsi bu balın kommersiya potensialını artırır.

Türkan İsgəndərli