Ombudsman “Sənin məlumatın, sənin hüququn” kampaniyasında iştirak etdi
Məlum olduğu kimi, 2015-ci il noyabrın 17-də Birləşmiş Millətlər Təşkilatının Təhsil, Elm və Mədəniyyət Təşkilatı (UNESCO) 28 sentyabr tarixini Ümumdünya İnformasiya Əldə Etmək Azadlığı günü kimi elan edib və 2025-ci ildə bütün dünyada bu əlamətdar günün elan olunmasının 10 illiyi qeyd edilir.
TodayPress TV xəbər verir ki, “Azərbaycan Respublikasının İnsan hüquqları üzrə Müvəkkili (Ombudsman) haqqında” Azərbaycan Respublikasının Konstitusiya Qanununa uyğun olaraq, Müvəkkil dövlət orqanlarının, bələdiyyələrin, publik hüquqi şəxslərin, onların vəzifəli şəxslərinin “İnformasiya əldə etmək haqqında” Azərbaycan Respublikası Qanununun tələblərindən irəli gələn vəzifələri yerinə yetirməsinə nəzarəti həyata keçirir.
Ombudsman təsisatı İnformasiya əldə etmək hüququnun təmin olunması sahəsində böyük nüfuza sahib olan, ictimai məlumata çıxışın müdafiəsini və təşviqini həyata keçirmək məqsədilə informasiya ombudsmanlarını, habelə digər sahələrdə fəaliyyət göstərən ombudsmanları və digər qurumları özündə birləşdirən İnformasiya Komissarlarının Beynəlxalq Konfransının (ICIC) 2023-cü ildən tam hüquqlu üzvüdür.
Ümumdünya İnformasiya Əldə Etmək Azadlığı günü ərəfəsində ICIC-nin, Şəffaflıq və İnformasiyaya Giriş Şəbəkəsinin (RTA) Gender və Həssas Qrupları üzrə İşçi Qrupunun və Buenos-Ayresdən olan həmkarlarımızın dəvəti ilə Müvəkkili Səbinə xanım Əliyeva bütün ölkələri bir araya gətirən və mühüm çağırışlara yönəlmiş “Sənin məlumatın, sənin hüququn” (Tu Info, Tu Derecho) kampaniyasında iştirak edib. Bununla da, bütün dünyada informasiya əldə etmək hüququnun əhəmiyyətinin vurğulanmasında, təşviqində, məlumatlılığın artırılmasında və məlumat əldə etmək hüququnun müdafiəsinin gücləndirilməsində dəstək olub. Bu kampaniya çərçivəsində Azərbaycan Ombudsmanın da yer aldığı foto-kollaj İbero-Amerika ölkələrinin bir çox sosial media platformalarında yayımlanıb.
