İcbari sığorta üzrə yığımlar 30%-ə yaxın azaldı
Bu ilin yanvar-fevral aylarında Azərbaycanda könüllü sığorta növləri üzrə 234 milyon 436 min manat, icbari sığorta növləri üzrə 43 milyon 126 min manat sığorta haqqı toplanılıb.
TodayPress TV Azərbaycan Mərkəzi Bankına istinadən xəbər verir ki, 2025-ci ilin yanvar-fevral ayları ilə müqayisədə könüllü sığorta növləri üzrə toplanan sığorta haqqları 6,5% və ya 14 milyon 346 min manat artıb.
İcbari sığorta növləri üzrə sığorta daxil olmaları isə 29,4% və ya 17 milyon 990 min manat azalıb.
Qeyd edək ki, hesabat dövründə könüllü sığorta növləri üzrə ödənişlərin məbləği 39,4% artaraq 121 milyon 772 min manat, icbari sığorta növləri üzrə ödənişlərin həcmi isə 27,3% artaraq 27 milyon 28 min manata bərabər olub.
Beləliklə, cari ilin yanvar-fevral aylarında könüllü sığorta bazarında toplanmış hər 100 manat sığorta haqqından 51.9 manat sığorta ödənişi edilib. Bu rəqəm ötən ilin eyni dövründə 39.7 manata bərabər olub. Bu ilin yanvar-fevral aylarında icbari sığorta bazarında hər 100 manat sığorta haqqına düşən ödənişin məbləği isə 62,7 manat təşkil edib ki, bu göstərici ötən ilin ilk iki ayında 34,7 manata bərabər idi.
