Sədr: “Məqsədimiz yeni yol layihələrinin ətraf mühitə təsirinin minimuma endirilməsidir”
"Mütəmadi olaraq müxtəlif infrastruktur layihələrinin ətraf mühitə təsirinin qiymətləndirilməsi (ƏMTQ) prosesi çərçivəsində ictimai dinləmələr keçirilir".
TodayPress TV xəbər verir ki, bu sözləri Ekologiya və Təbii Sərvətlər Nazirliyi (ETSN) yanında İctimai Şuranın sədri Amin Məmmədov bu gün keçirilən ictimai dinləmədə səsləndirib.
Onun sözlərinə görə, bu müzakirələr “Ətraf mühitə təsirin qiymətləndirilməsi haqqında” Azərbaycan Respublikası Qanununun tələblərinə əsasən, müvafiq sahədə fəaliyyət göstərən qeyri-hökumət təşkilatları, müstəqil ekspertlər, media nümayəndələri və ictimaiyyətin iştirakı ilə keçirilir. Ekspertlər və maraqlı tərəflər öz irad və təkliflərini birbaşa təqdim edə və suallarına yerində cavab ala bilirlər.
O əlavə edib ki, bu proses beynəlxalq hüququn da tələblərinə uyğundur:
“Məsələn, Orxus Konvensiyası ətraf mühitə dair məlumatlara ictimaiyyətin çıxışını təmin edir. Azərbaycan da bu konvensiyanın tərəfidir və hər bir vətəndaşın bu informasiyalara çıxış hüququ var. Hazırda ictimai müzakirədə olan layihələrdən biri “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı”nın icrasından irəli gələn məsələlərə uyğun olaraq tikilən Pirşağı–Novxanı–Xırdalan–M4 avtomobil yolunun Fatmayı kəndi, Ceyranbatan qəsəbəsi və Xırdalan şəhərləri ərazisindən keçən hissəsinin inşası layihəsidir. Layihə çərçivəsində yol tikintisinin ətraf mühitə təsiri, xüsusilə yaşıllıqların, ağacların qorunması məsələsi ön plandadır”.
Ekoloq diqqətə çatdırıb ki, Ekologiya və Təbii Sərvətlər Nazirliyi layihə icraçılarına ağacların qorunmasını əsas şərt kimi qoyub:
“Əgər kəsilmə labüddürsə, köçürülməsi mümkün olmayan ağacların əvəzinə bir neçə yeni ağac əkilməsi tələb olunur. Ətraf mühitin qiymətləndirilməsi üzrə ekspertlər bu məsələləri yerində araşdıraraq hesabatlar hazırlayır”.
Qeyd edək ki, müzakirə edilən digər layihələrdən biri də Ələt Azad İqtisadi Zonasında inşa edilməsi planlaşdırılan yeni hava limanı istiqamətində tikiləcək yol qovşağı ilə bağlıdır. Burada digər layihə isə Pirsaatçay çayının məcrasının dəyişdirilməsinə yönəlib. Amin Məmmədov bildirib ki, hava limanına olan yol layihəsi elə planlaşdırılmalıdır ki, çayın yüzillik təbii məcrasına zərər vurulmasın və ümumi ekosistemə mənfi təsir yaranmasın.
O vurğulayıb ki, müzakirələrin əsas məqsədi sifarişçi və podratçı qurumların layihəyə dair bütün məlumatları şəffaf şəkildə təqdim etməsi, ictimaiyyətin və mütəxəssislərin rəy və suallarının nəzərə alınmasıdır:
“Bu sahədə təcrübəsi və biliyi olan mütəxəssislər, o cümlədən mən də yerində suallar verərək cavab alırıq. Məqsəd, layihələrin ətraf mühitə təsirinin minimuma endirilməsi və ictimai maraqların qorunmasıdır”.
Qiymət Mahir
