Ombudsman beynəlxalq konfransda çıxış etdi

Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyeva Almaniya Federativ Respublikasının Berlin şəhərində keçirilmiş İnformasiya Komissarlarının XVl Beynəlxalq Konfransında (ICIC XVI) iştirak edib.

Bu barədə TodayPress TV-yə Ombudsman Aparatının Mətbuat Xidmətindən məlumat verilib.

“Rəqəmsal dövrdə ətraf mühitlə bağlı informasiyaya çıxış” mövzusunda keçirilən bu beynəlxalq konfransda “İnformasiya komissarlarının yeni çağırışlar və müsbət təcrübələrinin mübadiləsi” adlı interaktiv panel sessiyada çıxışı zamanı Müvəkkil informasiya əldə etmək hüququnun müdafiəsi və təşviqi istiqamətində həyata keçirdiyi fəaliyyəti barədə geniş məlumat verib.

Ombudsman “Azərbaycan Respublikasının İnsan hüquqları üzrə müvəkkili (ombudsman) haqqında” Konstitusiya Qanunu ilə dövlət orqanları, bələdiyyələr, publik hüquqi şəxslər, onların vəzifəli şəxsləri tərəfindən “İnformasiya əldə etmək haqqında” Azərbaycan Respublikasının Qanununun tələblərindən irəli gələn vəzifələrin yerinə yetirməsinə nəzarəti həyata keçirdiyini, bu hüququn müdafiəsi sahəsində müsbət təcrübələrə malik olduğunu konfrans iştirakçılarının diqqətinə çatdırıb.

Müvəkkil qeyd olunan sahədə həyata keçirilən fəaliyyətin daha da təkmilləşdirilməsi məqsədilə Ombudsman Aparatında müvafiq struktur bölmənin yaradıldığını, informasiya əldə etmək hüququnun pozulması ilə bağlı müraciətlərə operativ şəkildə baxıldığını, bu istiqamətdə davamlı olaraq paytaxda və regionlarda hüquqi maarifləndirmə tədbirlərinin həyata keçirildiyini diqqətə çatdırıb.

Ombudsman informasiya əldə etmək hüququnun təmini məqsədilə görülən işlərlə yanaşı, müraciətlərin poçt, elektron poçt, Ombudsman Aparatının sosial şəbəkə hesabları, həmçinin 24/7 rejimdə fəaliyyət göstərən “916” Çağrı Mərkəzi vasitəsilə qəbul edildiyini bildirib.

Ermənistanın hərbi təcavüzü nəticəsində torpaqlarımızın 30 ilə yaxın işğal altında qaldığını bildirən Ombudsman Səbinə Əliyeva bu müddət ərzində həmin ölkə tərəfindən beynəlxalq hüquq və beynəlxalq humanitar hüquq normalarının kobud şəkildə pozulmasına səbəb olan cinayətlər törədildiyini, bu faktlarla bağlı yerli və beynəlxalq ictimaiyyətin məlumatlandırılması məqsədilə faktaraşdırıcı missiyaların da həyata keçirildiyini diqqətə çatdırıb.

Ombudsman Ermənistan tərəfindən ərazilərimizdə törədilən cinayətlər, o cümlədən ekosid, urbasid, kulturasid, mina terroru, eləcə də Birinci Qarabağ müharibəsi zamanı itkin düşmüş dörd minə yaxın soydaşımızın taleyi barədə məlumatların əldə olunmaması ilə bağlı müvafiq beynəlxalq təşkilatlara dəfələrlə müraciətlər edildiyini bildirib, lakin mövcud ikili standartlar səbəbindən Ermənistana münasibətdə hər hansı bir ciddi tədbirlərin görülmədiyini qeyd edib.

Səfər zamanı Səbinə Əliyeva, həmçinin konfransda iştirak edən xarici ölkələrin ombudsmanları, milli insan hüquqları institutlarının rəhbərləri və informasiya komissarları ilə görüşlər keçirib, qarşılıqlı əməkdaşlıq və təcrübə mübadiləsi barədə müzakirələr aparılıb.

Səfər çərçivəsində Ombudsman Azərbaycan Respublikasının Dini Qurumlarla İş üzrə Dövlət Komitəsinin və Azərbaycan Respublikasının Almaniyadakı Səfirliyinin birgə təşkilatçılığı ilə Berlində Azərbaycan Mədəniyyət Mərkəzində “Müxtəliflikdə birlik: dialoqda dinlərarasi sədalar” mövzusunda keçirilmiş konfransda iştirak edib, tədbirdə iştirak edən dini icmaların nümayəndələri ilə və orada yaşayan soydaşlarımızla görüşüb.