Azərbaycan ilə Gürcüstan arasında əməkdaşlıq müzakirə olundu

Azərbaycanın mədəniyyət naziri Adil Kərimli Gürcüstanın mədəniyyət naziri xanım Tinatin Ruxadze ilə görüşüb.

Nazirlikdən TodayPress TV-yə bildiriblər ki, görüşdə Adil Kərimli Azərbaycan ilə Gürcüstan arasında münasibətlərin yüksək səviyyədə olduğunu deyib. Bildirib ki, dövlət və hökumət başçılarının mütəmadi xarakter alan qarşılıqlı səfərləri, imzalanan sənədlər, eləcə də iki ölkənin birgə həyata keçirdiyi önəmli layihələr xalqlarımızı daha da yaxınlaşdırır.

Ölkələrimiz arasında mədəniyyət sahəsi üzrə də əlaqələr dinamik şəkildə inkişaf edir. Mədəni əməkdaşlıqda yeni səhifələrin açılması üçün münbit şərait mövcuddur.

Qeyd olunub ki, Azərbaycan tərəfi Gürcüstanla yaradıcı sənayelər, muzey, kitabxana, film istehsalı və digər sahələrdə daha intensiv əməkdaşlıqda maraqlıdır.

Xanım Tinatin Ruxadze Azərbaycanla mədəni əməkdaşlığa önəm verdiklərini deyib. Gürcü nazir beynəlxalq mədəniyyət layihələrində birgə iştirak və yaradıcı kollektivlərin qarşılıqlı qastrol səfərlərinin bu sahədə əlaqələrin inkişafına töhfə verəcəyindən əminliyini bildirib.

Söhbət zamanı qarşılıqlı maraq doğuran digər məsələlər ətrafında fikir mübadiləsi aparılıb.