Təhsil problemi həll olundu: 3 şagird dekabrın 1-də dərslərə başlayacaq
Azərbaycan Uşaqlar Birliyinin Sədri Kəmalə Ağazadə noyabrın 14-də fərdi təhsilə yönləndirilməli olan üç şagirdlə bağlı narazılığını sosial mediada ifadə edib. O, paylaşımında bildirib ki, 16 yaşlı, 3-cü sinif səviyyəsinə uyğunlaşdırılmış qız günlərlə məktəbə başlamaq xəbərini gözləyib, lakin hər dəfə “hələ gözləyək” cavabı alıb. Bu gecikmə uşaqda ciddi psixoloji gərginlik yaradıb və o məktəb formasını kəsib.
TodayPress TV məsələ ilə bağlı Bakı Şəhəri üzrə Təhsil İdarəsinin (BŞTİ) Media və ictimaiyyətlə əlaqələr sektorunun müdiri Bəşarət Məmmədovla əlaqə saxlayıb.
O bildirib ki, məsələ artıq həll olunub və tapşırıq məktəbin direktoruna göndərilib. Bəşarət Məmmədov bu barədə Kəmalə Ağazadəyə məlumat verib:
"Məlumat üçün bildirirəm ki, müraciətlə bağlı artıq qərar verildi və tapşırıq 314 nömrəli tam orta məktəbə göndərildi. Üç şagird 1 dekabr 2025-ci il tarixindən müvafiq cədvəl üzrə fərdi təhsilinə başlayacaq".
Kəmalə Ağazadə yenilənmiş paylaşımında diqqətə görə təşəkkürünü bildirib və qeyd edib ki, yeni məktəb forması alacaq.
Türkan İsgəndərli
