Ermənistanda 16 müxalifətçinin həbsi tələb edilir

Ermənistanın İstintaq Komitəsi “Müqəddəs Mübarizə” hərəkatının həbsdə olan 16 üzvü və digər şəxslərin həbsi ilə bağlı məhkəməyə vəsatətlər təqdim edib.

TodayPress TV xəbər verir ki, bu barədə Ermənistan İstintaq Komitəsinin məlumatında deyilir. 

Saxlanılanların siyahısına hərəkatın lideri, arxiyepiskop Baqrat Qalstyan, polkovnik Mihran Maxsudyan, diakon Hrayr Akopyan, biznesmen Tiqran Qalstyan və bir sıra digər şəxslər daxildir. Onların arasında bir qadın var - Lidiya Mantaşyan da var.

Ermənistan parlamentinin “Hayastan” fraksiyasından olan deputatı Qeqam Manukyanın “Facebook” səhifəsində* vəkilə istinadən yazdığına görə, Qalstyanın həbsi ilə bağlı vəsatətə saat 22:00-da Avan və Nor Nork rayonlarının ümumi yurisdiksiya məhkəməsində baxılacaq.

İş hakim Masis Melkonyanın icraatına verilib. O, həmişə itaətsizlik aksiyalarının iştirakçılarının həbsi ilə bağlı vəsatətləri təmin edən hakim kimi tanınır.