“Angara-1.2” raketi orbitə buraxıldı

Avqustun 21-də Rusiyanın Arxangelsk vilayətindəki Plesetsk kosmodromundan “Angara‑1.2” adlı yüngül sinif raket‑daşıyıcısı ilə kosmik aparatların orbitə buraxılması həyata keçirilib.

TodayPress TV xəbər verir ki, bu barədə Rusiya Müdafiə Nazirliyi məlumat yayıb.

Rəsmi açıqlamada bildirilib ki, raketin buraxılışı və peyklərin hesablanmış orbitlərə yerləşdirilməsi normal rejimdə baş verib. Buraxılışdan dərhal sonra “Angara-1.2” raketi Herman Titov adına Baş Sınaq Kosmik Mərkəzinin yerüstü avtomatlaşdırılmış idarəetmə kompleksi tərəfindən nəzarətə götürülüb.

Məlumata əsasən, kosmik aparatların hədəf orbitlərə çıxarılması və Kosmik Qüvvələrin yerüstü nəzarət sistemlərinə təhvil verilməsi planlaşdırıldığı kimi həyata keçirilib. Peyklərlə sabit telemetriya əlaqəsi qurulub.

Qeyd edək ki, “Angara‑1.2” Rusiyada istehsal edilən və müxtəlif yük daşıma imkanlarına malik yeni nəsil raketlərdən biridir. Bu uğurlu buraxılış ölkənin müdafiə və kosmik imkanlarının genişləndirilməsi baxımından mühüm addım hesab olunur.

Töhfə Səməd