Qəbələdə prokurorluq əməkdaşları üçün yeni xidməti mənzillər istifadəyə verildi

Avqustun 8-də Baş prokuror Kamran Əliyev Qəbələdə prokurorluq işçiləri üçün inşa edilmiş yeni xidməti mənzillərin təhvil verilməsi mərasimində iştirak edib.

TodayPress TV xəbər verir ki, Qəbələ rayon prokurorluğunun əməkdaşlarının sosial-məişət şəraitinin yaxşılaşdırılması məqsədilə tikilmiş mənzillər bütün zəruri şərait və avadanlıqlarla təchiz olunmaqla tam yaşayış üçün hazır vəziyyətə gətirilib.

Tədbirdə çıxış edən Baş prokuror vurğulayıb ki, Prezident cənab İlham Əliyevin rəhbərliyi ilə ölkədə həyata keçirilən islahatlar çərçivəsində prokurorluq orqanlarında da yenilənmə və inkişaf prosesi davam etdirilir. Bu islahatlar təkcə hüquqi institutların təkmilləşdirilməsini deyil, eyni zamanda əməkdaşların peşə hazırlığının artırılması, onların fəaliyyətinin səmərəliliyinin yüksəldilməsi, iş şəraitinin müasirləşdirilməsi və sosial rifahının yaxşılaşdırılmasını da əhatə edir.

Baş prokuror qeyd edib ki, xidməti mənzillərlə təminat, əməkdaşların maddi rifah səviyyəsinin artırılması və digər sosial dəstək mexanizmləri dövlətin hüquq-mühafizə orqanlarına, o cümlədən prokurorluq sisteminə göstərdiyi yüksək diqqət və qayğının bariz nümunəsidir. 

Daha sonra Baş prokuror yeni mənzillərə baxış keçirib, yaradılmış şəraitlə tanış olub.