Bakıda intensiv yağışlar: İnfrastruktur niyə tab gətirmir?
Martın 27-dən etibarən ölkə ərazisində müşahidə olunan intensiv yağışlar paytaxt Bakıda ciddi fəsadlar törədib.
Memar Cahid Həsənov bu barədə TodayPress TV-yə danışarkən bildirib ki, paytaxtdakı mövcud su-kanalizasiya sistemləri bugünkü tələblərə uyğun deyil.
Onun sözlərinə görə, bu məsələ ilə bağlı Memarlıq və Şəhərsalma İdarəsində qərar verilib və işə başlanılıb.
“Bu sistemlər 40-60 il əvvəl, o dövrdə Bakının 1 milyon əhalisi nəzərə alınaraq çəkilmişdi və əlavə olaraq 500 min nəfərlik hesablamalar da aparılırdı. Yəni o vaxt bu sistem 1,5 milyon əhali üçün nəzərdə tutulmuşdu və 10-30 il ərzində tələblərə cavab verirdi.
Lakin bu gün Bakının əhalisi 3-4 milyon nəfərə çatıb. Bundan əlavə, 40-50 il əvvəl Sovetlər Birliyi dövründə bir prospektdə yalnız bir qastronom və bir-iki ictimai obyekt var idi. İndi həmin prospektdə onlarla qastronom, iaşə obyektləri və hündürmərtəbəli yaşayış binaları fəaliyyət göstərir. Yəni yük dörd dəfə artıb. Deməli, 50-60 il əvvəlki kanalizasiya sistemi də 4-5 dəfə gücləndirilməli idi”.
Memar əlavə edib ki, Sovet dövründə tökmə betondan istifadə edilərək quraşdırılmış bu sistemlər keyfiyyət baxımından müasir standartlara cavab vermir. Üstəlik, onların istismar müddəti də başa çatıb:
“Yeni kanalizasiya sistemi 3-5 il ərzində tam şəkildə yenilənəcək. Dövlət bu barədə qərar verib və işə start verilib. Yeni texnologiyalarla və yüksək yükə davamlı çəkiləcək sistem gələcəkdə bu kimi problemlərin qarşısını alacaq. Yəni məsələyə sadə bir nümunə ilə baxsaq, bir prospektdəki vəziyyəti müqayisə etməklə vəziyyət aydın olur, yük dörd dəfə artıb, sistem isə eyni qalıb”.
Cahid Həsənov qeyd edib ki, bu işlər mərhələ ilə həyata keçiriləcək.
Türkan İsgəndərli
