"Apple" maqnitlərə sərmayə qoyacaq

"Apple" ABŞ-də nadir torpaq metalları istehsal edən "MP Materials" şirkəti ilə əməkdaşlıq edəcək və bu məqsədlə 500 milyon dollar sərmayə yatıracaq. 

TodayPress TV xəbər verir ki, bu sərmayə "Apple" məhsulları üçün ABŞ-də istehsal olunan nadir torpaq maqnitləri hazırlamaq üçündür. 

Pulun bir hissəsi Texas ştatında yerləşən zavodun genişləndirilməsinə və "Apple" üçün xüsusi istehsal xətlərinin qurulmasına xərclənəcək. Kaliforniyada isə yeni emal zavodu tikiləcək.

Həmçinin, bu əməkdaşlıq çərçivəsində yeni materiallar və texnologiyalar hazırlanacaq. Layihə nəticəsində ABŞ-də onlarla yeni iş yeri yaradılacaq. "Apple" rəhbəri Tim Kuk bildirib ki, bu materiallar müasir texnologiyalar üçün çox vacibdir və bu layihə ABŞ-nin təchizatını gücləndirəcək. 

Bu əməkdaşlıq, "Apple"ın ABŞ iqtisadiyyatına növbəti dörd ildə 500 milyard dollardan çox sərmayə yatırmaq planının bir hissəsidir. Bu plana həmçinin çip istehsalı, süni intellekt serverləri və "Apple TV+" üçün məzmun istehsalı da daxildir. Bu qərar ABŞ hökumətinin "Apple"a istehsal proseslərini ölkəyə qaytarmaq təzyiqləri fonunda verilib.

Türkan İsgəndərli