Tennisçi azarkeşi “mərcçi” olduğu üçün tribunadan çıxartdırdı

İsveçrəli tennisçi, dünya reytinqində 435-ci yerdə qərarlaşan Leandro Ridi US Open turnirinin ikinci turunda maraqlı hadisə ilə gündəmə gəlib. 

TodayPress TV xəbər verir ki, o, argentinalı Fransisko Serundoloya qarşı görüşdə (3:6, 4:6, 6:4, 6:4, 6:2) hakimdən bir tamaşaçının meydançadan uzaqlaşdırılmasını xahiş edib.

“Bu oğlan məni susmadan təhqir edir. O, mənim oyunlarıma mərc edir. Uduzanda dərhal mənə yazır: ‘Sən dəhşətsən, ümid edirəm, anan ölər’. Onu görmək istəmirəm, çıxarın”.

Hakim təhlükəsizlik əməkdaşları ilə əlaqə saxlasa da, həmin şəxs kortu özü tərk edib.

Ridi oyundan sonra oyunda baş verənlərə münasibət bildirib:

“Belələri dərhal seçilir. Artıq çox görmüşəm. Onu hələ ilk turda da görmüşdüm, hətta ilk xaldan sonra adımı qışqırmağa başlamışdı. Dördüncü setdə geri qalanda düşündüm ki, uduzsam, yenə anam haqqında nalayiq sözlər yazacaq. Sonra isə daha çox təzyiq etməyə başladı”.

Qeyd edək ki, gənc tennisçi çətin matçdan qələbə ilə ayrılaraq növbəti mərhələyə yüksəlib.

Namiq HUN