Orpo: "Rusiya sülh danışıqlarına ciddi yanaşmır"

Finlandiyanın Baş naziri Petteri Orpo bildirib ki, Rusiya açıq şəkildə sülh istədiyini nümayiş etdirmir.

TodayPress TV xəbər verir ki, o, bu barədə Şimal ölkələrinin Baş nazirlərinin qeyri-rəsmi yay toplantısında çıxışı zamanı danışıb.

Orpo Rusiyanın son dövrlərdəki hücumlarına istinad edib. Rusiya ötən həftəsonu müharibənin əvvəlindən bəri Ukrayna boyunca ən genişmiqyaslı hava hücumlarını həyata keçirib. Bu hücumlar əsasən paytaxt Kiyevə yönəlib və nəticədə aralarında uşaqların da olduğu onlarca insan ölüb və yaralanıb.

Qeyd edək ki, Baş nazirlər mayın 26-da Paimio və Turku şəhərlərində toplanıblar. Görüşdə rəqabət qabiliyyəti, təchizat təhlükəsizliyi və Ukraynaya dəstək məsələləri müzakirə olunub.

Töhfə Səməd