Banklar kiçik məbləğdə valyuta dəyişmir: "Vətəndaşın hüququ pozulur"

Azərbaycanda bəzi banklar valyuta mübadiləsi zamanı kiçik məbləğdə valyuta dəyişmir və ya xırda pul verməkdən imtina edirlər.

Sözügedən məsələ vətəndaşlar arasında son günlər müzakirə mövzusu olub.

Məsələ ilə bağlı iqtisadçı Akif Nəsirli TodayPress TV-yə açıqlamasında bildirib ki, ölkədə valyuta mübadiləsi əməliyyatları "Valyuta tənzimi haqqında" Qanun və Azərbaycan Mərkəzi Bankının normativ aktları ilə tənzimlənir.

Onun sözlərinə görə, mübadilə yalnız banklar, onların filialları və xüsusi lisenziyası olan qeyri-bank kredit təşkilatları tərəfindən həyata keçirilə bilər.

"Bankların müştəriyə xırda pul verməkdə çətinlik çəkməsi valyuta çatışmazlığı ilə bağlı ola bilər. Lakin bu, onların öhdəlikdən imtina etməsi üçün hüquqi əsas yaratmır. Qanunvericilikdə müştərinin valyuta dəyişməsi üçün minimal və ya maksimal məbləğ tələbi yoxdur. Yəni istənilən məbləğin dəyişdirilməsi müştərinin hüququdur. Buna baxmayaraq, bəzi banklar "xırda valyutanın olmaması" və ya "texniki səbəblər" adı altında xidmətdən yayınır. Bu isə normativ əsas daşımır, yalnız bankların daxili əməliyyat siyasəti ilə bağlıdır".

İqtisadçı qeyd edib ki, vətəndaşlar belə hallarda, bankdan xidmət göstərilməsini və qəbz verilməsini tələb edə bilərlər. Əsassız imtina olduqda isə şikayət hüququna malikdirlər:

"Şikayətlər banka, Azərbaycan Respublikası Mərkəzi Bankına,  Maliyyə Ombudsmanına, məhkəməyə ünvanlana bilər. Bankların kiçik məbləğdə valyuta dəyişməkdən və ya xırda pul verməkdən imtina etməsi qanunla təsbit olunmuş hal deyil və müştərilər bu səbəbdən şikayət etmək hüququna malikdirlər", - deyə Akif Nəsirli fikrini sonlandırıb.

Türkan İsgəndərli

TodayPress TV