Şəkərli isti içkilər dişlər üçün risk yaradır
Yeni il tətilləri dövründə kakao, isti şokolad və digər şəkərli isti içkilərin qəbulu diş çürüməsi və diş minasının zədələnməsi riskini əhəmiyyətli dərəcədə artıra bilər.
TodayPress TV xəbər verir ki, bu tip içkilər xüsusilə diş sağlamlığı üçün təhlükəlidir.
Bildirilir ki, tərkibində şərbət, qaymaq, zefir və şokolad sousu olan qəhvə və digər isti içkilər dişlərə daha çox zərər vurur. Belə içkilər adətən yavaş-yavaş içildiyindən və isti temperaturda qəbul edildiyindən şəkər diş səthində uzun müddət qalır. Bu isə bakteriyaların çoxalması üçün əlverişli mühit yaradır, nəticədə diş minası zədələnir və çürük riski artır.
Mütəxəssislərin sözlərinə görə, əlavə olunan komponentlər də əlavə təhlükə mənbəyidir. Qaymaq, zefir və şərbətlər yüksək şəkər tərkibi və yapışqan quruluşu səbəbindən tüpürcək vasitəsilə dişlərdən çətin təmizlənir. Bayram mövsümündə isə insanlar çox vaxt fərqinə varmadan gündəlik şəkər qəbulunu əhəmiyyətli dərəcədə artırırlar.
Eyni zamanda, şirniyyat və şəkərli məhsulların həddindən artıq istehlakı qanda qlükoza səviyyəsinin sürətlə yüksəlməsinə və bədəndə iltihabi proseslərin güclənməsinə səbəb ola bilər.
Qeyd olunur ki, şəkərin yüksək miqdarı, içkilərin turşuluğu və onların uzun müddət ərzində qəbul edilməsi dişlər və diş ətləri üçün zədələnmə baxımından əlverişli şərait yaradır.
Türkan İsgəndərli
