FHN-in Cənub Regional Mərkəzi təlim keçirdi

Fövqəladə Hallar Nazirliyinin Cənub Regional Mərkəzinin təşkilatçılığı ilə Lənkəran şəhərinin Xəzər dənizi sahilində “Su hövzələrində insanların təhlükəsizliyinin təmin olunması” mövzusunda təlim keçirilib. 

Bu barədə TodayPress TV-yə FHN-dən məlumat verilib.

Təlimin keçirilməsində əsas məqsəd su hövəzələrində müvafiq təhlükəsizliklə bağlı qabaqlayıcı tədbirlərin həyata keçirilməsi, xilasedicilərin suda boğulma halları ilə əlaqədar xilasetmə əməliyyatları, habelə ilkin yardımın göstərilməsi üzrə praktiki vərdişlərinin daha da təkmilləşdirilməsi olub. 

Təlimdə FHN-in Cənub Regional Mərkəzi, Kiçikhəcmli Gəmilərə Nəzarət və Sularda Xilasetmə Dövlət Xidməti, Xüsusi Riskli Xilasetmə Xidmətinin xilasediciləri, Lənkəran Şəhər-Rayon Polis Şöbəsinin və Lənkəran Rayon Təcili və Təxirəsalınmaz Tibbi Yardım Stansiyasının əməkdaşları iştirak ediblər. 

Şərti olaraq baş vermiş sudaboğulma hadisəsi zamanı xilasedicilər zərərçəkmişləri “xilas edərək” ilkin yardım göstərdikdən sonra aidiyyəti üzrə təhvil veriblər. 

Təlim bitdikdən sonra nəticələri təhlil olunub, müvafiq tapşırıqlar verilib.