Prezidentin köməkçisi: "Çin-Azərbaycan münasibətləri hərtərəfli strateji tərəfdaşlığa əsaslanır"

"Çin-Azərbaycan münasibətləri hərtərəfli strateji tərəfdaşlığa əsaslanır və bir çox sahələrdə dinamik inkişaf edir".

TodayPress TV APA-ya istinadən xəbər verir ki, bunu jurnalistlərə açıqlamasında Azərbaycan Respublikası Prezidentinin köməkçisi - Azərbaycan Respublikası Prezidentinin Administrasiyasının Xarici siyasət məsələləri şöbəsinin müdiri Hikmət Hacıyev bildirib.

Hikmət Hacıyev qeyd edib ki, Azərbaycan və Çinin çox gözəl siyasi əlaqələri var: “Əlaqələrimizin inkişafında Azərbaycan Prezidenti İlham Əliyevin bu il Çinə dövlət səfəri mühüm rol oynadı. Bu gün həmçinin Çin Xalq Respublikasının sədri Si Cinpin ilə Azərbaycan Prezidenti İlham Əliyev arasında daha bir səmərəli görüş oldu. Onlar bir-birlərini “Mənim əziz dostlarım” adlandırır. Bu ruh bir daha Çin və Azərbaycan arasındakı dostluq əlaqələrinin təcəssümüdür. Azərbaycan həmişə tək Çin siyasətini dəstəkləyib. Biz Çinin Tayvan, Honq-Konq və Sincan bölgəsi ilə bağlı siyasətini dəstəkləyirik”.

Azərbaycan və Çinin terrorizm, ekstremizm və separatizmlə mübarizədə səylərini qeyd edən Hikmət Hacıyev deyib ki, Çin və Azərbaycan ölkələrin daxili işlərinə qarışmama və ölkələrin iqtisadi inkişaf modeli üçün suveren seçim prinsiplərini rəhbər tuturlar: “Bu siyasi ruh həm də ölkələrimiz arasında iqtisadi-ticari əlaqələr, texnoloji əməkdaşlığa çevrilir. Bu gün Azərbaycan Prezidenti Çinin enerji, bərpa olunan enerji texnologiyası, rabitə, bir çox başqa sahələr üzrə aparıcı şirkətləri ilə görüşlər keçirəcək. Ümid edirik ki, bu səfər Çin-Azərbaycan iqtisadi-ticarət əlaqələrinin gələcək inkişafına səmərəli töhfə verəcək”.