Mənzil almaq artıq kifayət deyil — Ekspertdən qadınlara ÇAĞIRIŞ
“Qadınlar yalnız mənzil alan tərəf deyil, həm də onu planlaşdıran və idarə edən tərəf olmalıdır”.
TodayPress TV xəbər verir ki, bunu Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində təşkil olunan “İnnovativ təcrübələr” adlı paneldə LUMANTI Sığınacaq Dəstəyi Qrupunun icraçı direktoru, Cənubi Asiya üzrə Təmiz Su Fəaliyyət Şəbəkəsinin regional əlaqələndiricisi və Mənzil Hüquqları üzrə Asiya Koalisiyasının əlaqələndiricisi Lajana Manandhar deyib.
O bildirib ki, icmaların təşkilatlanması ilk növbədə yerli səviyyədə yığım qruplarının yaradılması ilə başlayır, daha sonra bu qruplar şəhər və milli səviyyədə birləşdirilir və rəsmiləşdirilir.
Lajana Manandhar vurğulayıb ki, qeyri-rəsmi fəaliyyət imkanları məhdudlaşdırdığı üçün qadın qruplarının hüquqi status alması və institusional güclənməsi vacibdir:
“Bu, onların yerli hakimiyyətlərlə əməkdaşlıq etməsinə və milli səviyyədə dialoq qurmasına imkan yaradır. Qadın təşkilatlarının inkişafı üçün təlimlər, seminarlar, təcrübə mübadilələri və liderlik proqramları həyata keçirilir. Bu proses qadınların biliklərini artırır, onların media ilə işləməsinə və öz gündəmlərini inamla müdafiə etməsinə şərait yaradır”.
Ekspert əlavə edib ki, Nepalda yaradılmış Şəhər İcma İnkişaf Fondunda qadınların rəhbərlik etdiyi yığım və kredit kooperativləri xəzinədar funksiyasını yerinə yetirir və fondun idarə edilməsində iştirak edir.
Onun sözlərinə görə, qadınlar investisiya prioritetlərinin müəyyənləşdirilməsində və qərarların qəbulunda birbaşa rol oynayırlar.
Lajana Manandhar bildirib ki, qadınların iştirakı yalnız mənzillərin layihələndirilməsi ilə məhdudlaşmır:
“Biz təkcə evləri deyil, bütün məhəlləni və icmanı layihələndiririk. Qadınlar bu prosesin bütün mərhələlərində – planlaşdırma, tikinti və hətta satınalma prosesində iştirak edirlər. 2015-ci ildə Katmanduda baş verən zəlzələdən sonra qadın qrupları müvəqqəti sığınacaqların tikintisinə dəstək göstərib, satınalma və tikinti prosesində fəal iştirak ediblər”.
Qiymət Mahir
