Arzu Erdem: TDT-nin Qəbələ Sammiti regional sülhə və inkişafa töhfə verən tarixi bir görüş kimi yadda qaldı
Türk Dövlətləri Təşkilatının (TDT) Azərbaycanın tarixi Qəbələ şəhərində keçirilən 12-ci Zirvə Görüşü çox böyük uğurla başa çatdı. “Regional sülh və təhlükəsizlik” mövzusunda təşkil olunan bu toplantı türk dünyası ölkələri arasında həmrəyliyi gücləndirməyi, ortaq məqsədləri möhkəmləndirməyi və regional sabitliyə dəstək verməyi hədəflədi.
Bu fikirləri TodayPress TV– yə açıqlamasında türk siyasətçi, Milliyyətçi Hərəkat Partiyasının (MHP) Türkiyə Böyük Millət Məclisindəki sabiq deputatı Arzu Erdem deyib.
O bildirib ki, siyasi, iqtisadi, mədəni və təhlükəsizlik sahələrində əməkdaşlığın dərinləşdirilməsinə dair qərarların qəbul olunduğu, türk dünyasının gələcəyini müəyyənləşdirəcək yeni təşəbbüslərin müzakirə edildiyi Zirvə Görüşünün nəticəsində qəbul edilən Bəyannamə ilə regional sülhün qorunması, ortaq müdafiə və təhlükəsizlik əməkdaşlığının gücləndirilməsi, iqtisadi inteqrasiyanın sürətləndirilməsi və mədəni əlaqələrin daha da möhkəmləndirilməsi istiqamətində güclü mesajlar verildi. Həmçinin enerji, nəqliyyat, rəqəmsal transformasiya, təhsil və ətraf mühit sahələrində ortaq layihələrin dəstəklənməsi də qərara alındı.
“Liderlər bununla türk dünyasının beynəlxalq aləmdə daha fəal mövqeyə sahib olması, müstəqillik və suverenlik prinsipləri əsasında ortaq bir baxışla hərəkət edilməsinin vacibliyini vurğulamış oldular. Beləliklə, Türk Dövlətləri Təşkilatının 12-ci Zirvə Görüşü türk dünyasında birliyi, qardaşlığı və qarşılıqlı etimadı möhkəmləndirən, regional sülhə və inkişafa töhfə verən tarixi bir görüş kimi yadda qaldı”.
