Rusiyaya mədəniyyət dərsi: “Ayvazovskinin abidəsi qanunsuz formada yerləşdirilmişdi” – POLİTOLOQ

“Erməni əsilli rəssam İvan Ayvazovski (Hovhannes Ayvasyan) rus və ermənilər üçün dahi sənətkar sayıla bilər. Ancaq o, Azərbaycan üçün heç bir xüsusi tarixi və ya mədəni dəyər daşımır. Xankəndidəki abidəsinin sökülməsi nə Rusiyaya, nə də Ermənistana qarşı yönəlmiş mədəni xarakterli addım kimi dəyərləndirilməməlidir.”

Politoloq Azər Qasımov bunu TodayPress TV-yə açıqlamasında deyib.

O, Azərbaycan Xarici İşlər Nazirliyinin mətbuat katibi Ayxan Hacızadəyə istinad edərək bildirib ki, həmin heykəl qanunsuz və planlaşdırılmamış şəkildə, müəyyən məqsədlərlə yerləşdirilmişdi. Bu səbəbdən, Azərbaycan onu öz ərazisində görmək istəməyib:

“Bakının bir çox görkəmli məkanlarında, məsələn, Üzeyir Hacıbəyli, Zərifə Əliyeva və Puşkin küçələrinin kəsişdiyi ərazidə Aleksandr Puşkinin heykəli və bağı illərdir yerində qalır. Əgər Azərbaycanın məqsədi mədəni irsi hədəf almaq olsaydı, bu abidələrə də müdaxilə olunardı. Lakin bu, baş verməyib. Bu baxımdan, Ayvazovskinin büstü ilə bağlı məsələnin şişirdilməsinə ehtiyac yoxdur. Həmin abidənin sökülməsi hər hansı xüsusi mesaj xarakteri daşımır, Azərbaycan bu addımla heç bir dairəyə nəsə anlatmağa çalışmır”. 

Analitik əlavə edib ki, bu hadisənin süni şəkildə siyasiləşdirilməsi cəhdləri əsassızdır və onun sülh danışıqlarına təsir edəcəyi qənaəti gerçəkliyi əks etdirmir:

“Azərbaycan öz suveren ərazisində kimə abidə qoyacağına özü qərar verir. Ermənistan tərəfi də bu reallığı çox yaxşı anlayır”.

Qeyd edək ki, Rusiya Prezidentinin beynəlxalq mədəniyyət əməkdaşlığı üzrə xüsusi nümayəndəsi Mixail Şvıdkoy Azərbaycan Respublikasının Xankəndi şəhərində İvan Azvazovskinin büstünün sökülməsi məsələsini şərh edərkən bildirib ki, Azərbaycan tərəfinin bu addımı dərin təəssüflə qarşılanıb, Rusiyaya qarşı xoşagəlməz və qeyri-dost addım kimi qiymətləndirilir. O, Azərbaycan tərəfini ehtiyatlılıq nümayiş etdirməyə, “abidələrlə müharibəyə”, rus mədəniyyətinin “ləğv edilməsi” tədbirlərinə son qoymağa çağırış edib. 

Azərbaycan Xarici İşlər Nazirliyinin mətbuat katibi Ayxan Hacızadə isə Şvıdkoyun açıqlamasına münasibət bildirərək əlavə edib ki, Putinin xüsusi nümayəndəsi ilk dəfə deyil ki, müvafiq tapşırıq əsasında anti-Azərbaycan kampaniyasiyasına qoşulur:

"Erməni əsilli rəssam İvan Ayvazovskinin (Hovanes Ayvasyan) büstünün Rusiya sülhməramlıları tərəfindən Azərbaycan tərəfinin icazəsi olmadan torpaqlarımızda quraşdırılması qanunsuz idi. Bu, Azərbaycan Respublikasının suverenliyinə münasibətdə Rusiya tərəfindən hörmətsizliyin təzahürü olub".

Qiymət Mahir