Xəzər dənizinin səviyyəsi və regional ekoloji əməkdaşlıq müzakirə olundu

21–23 may 2025-ci il tarixlərində Sankt-Peterburq şəhərində Azərbaycan–Rusiya İşçi Qrupunun Xəzər dənizinin səviyyəsinin enməsi məsələsinə dair ilk iclası, eləcə də XI Neva Beynəlxalq Ekoloji Konqresi çərçivəsində mühüm görüş və müzakirələr keçirilib.

TodayPress TV xəbər verir ki,  Ekologiya və təbii sərvətlər nazirinin müavini Rauf Hacıyevin rəhbərlik etdiyi nümayəndə heyəti hər iki tədbirdə iştirak edib.   

21 may tarixində keçirilmiş İşçi Qrupun iclası 2024-cü ilin dekabrında Bakıda keçirilən nazirlərin görüşündə əldə olunmuş razılaşmaların davamı olaraq təşkil olunub.

İclasda tərəflər Xəzər dənizinin səviyyəsinin enməsi ilə bağlı birgə Proqram layihəsini, onun icra mexanizmlərini və növbəti mərhələlər üzrə fəaliyyətləri müzakirə ediblər. 

22–23 may tarixlərində nümayəndə heyəti XI Neva Beynəlxalq Ekoloji Konqresinin sessiyalarında iştirak edib.

Konqres çərçivəsində keçirilən müzakirələrdə Xəzər dənizinin səviyyəsinin aşağı düşməsi, iqlim dəyişikliklərinə qarşı dayanıqlılığın artırılması və transsərhəd ekoloji əməkdaşlığın inkişafı kimi aktual məsələlər diqqət mərkəzində olub.