Pakistan ilk dəfə ABŞ-dən neft idxal edir

Pakistanın ən böyük neft emalı şirkəti "Cnergyico" bu ilin oktyabr ayında 1 milyon barrel ABŞ istehsalı olan "West Texas Intermediate" (WTI) xam neftini idxal edəcək. 

TodayPress TV xəbər verir ki, bu barədə şirkətin rəhbər müavini Osama Qureşi bildirib.

Onun sözlərinə görə, bu partiya qlobal əmtəə treyderi "Vitol" ilə uzunmüddətli müqavilə çərçivəsində sınaq məqsədilə alınıb. Əgər bu alış sərfəli olarsa, "Cnergyico" gələcəkdə ayda ən azı bir partiya ABŞ nefti idxal etməyi planlaşdırır.

Bu müqavilə, ABŞ prezidenti Donald Trampın Pakistanı ixracata tariflər tətbiq etməklə hədələdikdən bir neçə ay sonra baş tutub. Bildirilir ki, bu addım Pakistanın ABŞ ilə enerji və ticarət əlaqələrini genişləndirmək niyyətində olduğunu göstərir.

Qeyd olunur ki, bu, həm də Pakistanın Yaxın Şərqdən asılı neft təchizatı siyasətində dönüş nöqtəsidir. Neft ölkənin ən iri idxal məhsuludur və 2024–2025-ci maliyyə ilində (30 iyunda başa çatıb) bu sahədə idxalın dəyəri 11,3 milyard dollar təşkil edib ki, bu da ölkənin ümumi idxalının 20 faizinə bərabərdir.

Türkan İsgəndərli